नेपालमा ह्युन्दे स्यान्टोको २५ वर्ष: साना गाडीको कथा बदल्ने कार

काठमाडौँ: ह्युन्दे स्यान्ट्रो पहिलो पटक नेपाल भित्रिँदा साना गाडीको बजारमा जापानी ब्रान्डहरूको प्रभुत्व थियो र भारतमा उत्पादन भएका गाडीप्रतिको विश्वास विस्तारै विकसित हुँदै थियो।

सन् १९९९ मा ह्युन्दे इन्डियाले आफ्नो पहिलो मोडेलका रूपमा स्यान्ट्रो सार्वजनिक गरेको थियो। दैनिक प्रयोगका लागि उपयुक्त सोचविचार गरेर डिजाइन गरिएको र आरामदायी स्यान्ट्रो सुरु देखिनै फरक पहिचान बनाउन सफल भयो। यसलाई अझ विशेष बनाउँदै नेपाल ह्युन्दे स्यान्ट्रोको पहिलो निर्यात बजार समेत बन्यो।

यो केवल एक गाडीको सुरुवात मात्र होइन, ह्युन्दे र नेपाल दुवैका लागि गर्वको क्षण थियो।

स्यान्ट्रोले नेपाली ग्राहकहरूको ह्याचब्याकप्रतिको धारणा नै परिवर्तन गर्‍यो। सानो गाडी पनि भरपर्दो, आकर्षक, मर्मतमा सजिलो र नेपाली सडक तथा पारिवारिक आवश्यकताअनुसार उपयुक्त हुन सक्छ भन्ने सन्देश स्यान्ट्रोले दियो। समयसँगै स्यान्ट्रो केवल गाडी मात्र रहेन, नेपाली परिवारहरूको भरोसा योग्य साथी बन्यो र यही आधारमा ह्युन्देले नेपालमा आफ्नो यात्रा अघि बढायो।

नेपालमा स्यान्ट्रोको २५ वर्ष पूरा भएको छ। कम्पनीले यो एउटा प्रतिष्ठित मोडेल मात्र नभई, त्यसबाट सुरु भएको भरोसाको विरासत पनि भएको बताएको छ।

यस विशेष अवसरमा ह्युन्दे इन्डिया र ह्युन्दे नेपालको सहकार्यमा सन् २००० मोडेल वर्षका ह्युन्दे स्यान्ट्रोका प्रयोगकर्ताहरूलाई ह्युन्दे नेपालसँग सम्पर्क गर्न पनि अनुरोध गरिएको छ। छनोटमा परेका ग्राहकहरूले ह्युन्देद्वारा तयार गरिएको सरप्राइज प्राप्त गर्नेछन्।