चुनावअघि उच्च अंकले बढेर बन्द भयो सेयर बजार, नेप्से २७०० विन्दुमाथि

काठमाडौँ: चुनावअघिको अन्तिम कारोबार दिन सेयर बजारमा उच्च अंकको सुधार देखिएको छ। मंगलबार नेप्से परिसूचक ३८.५२ अंकले बढेर दुई हजार ७१२.४९ विन्दुमा बजार बन्द भएको छ।

यसदिन ट्रेडिङबाहेक अन्य सबै अर्थात् १२ वटा उपसमूहको सेयरमूल्य बढेको छ।

कारोबारमा आएका २६२ कम्पनीहरूमध्ये २५४ कम्पनीको सेयर मूल्य बढेको छ। यसदिन ६ वटा कम्पनीको सेयरमा मात्रै रातो लागेको छ भने दुई कम्पनीको स्थिर छ।

मंगलबार साल्पा विकास बैंकको सेयर सर्वाधिक ९.९९ प्रतिशत, पञ्चकन्या माई हाइड्रोपावरको सेयर ९.८९ प्रतिशत र रिलायन्स स्पिनिङ मिल्सको सेयर ९.८२ प्रतिशतले बढेको छ।

कारोबार रकमका आधारमा आँखु खोला जलविद्युतको सर्वाधिक ३४ करोड रुपैयाँ बराबरको सेयर कारोबार भएको छ।

आगामी निर्वाचनका लागि सरकारले फागुन २०,२१ र २२ गते सार्वजनिक विदा दिएको छ। २३ गते शनिबार र २४ गते नारी दिवसको सार्वजनिक विदा भएकाले अब बजार फागुन २५ गतेपछि मात्रै खुल्नेछ। प्रतिनिधिसभा निर्वाचनमा दलहरूले पुँजी बजार सुधारका लागि सकारात्मक बाचा गरेका कारण त्यसको प्रभाव चुनावअघि बजारमा देखिएको हो।

अब बन्ने सरकार  र उक्त सरकार नीतिले अबको बजार कतातर्फ जानेछ भन्ने निर्धारण हुनेछ। यद्यपि, चुनावअघि नै लगानीकर्तामा उत्साह भने देखिएको छ। पछिल्ला ६ कारोबार दिनमा मात्रै सेयर बजार १०० अंकभन्दा बढीले उकालिएको छ।

मंगलबार नेप्सेसँगै कारोबार रकम पनि बढेको छ। अघिल्लो कारोबार दिन आइतबार ५ अर्ब ६४ करोड रुपैयाँ बराबरको कारोबार भएकोमा यसदिन ६ अर्ब २३ करोड ४३ लाख ८१ हजार रुपैयाँ बराबर १ करोड ५१ लाख ८४ हजार कित्ता  सेयर किनबेच भएको छ।