कारोबार रकमसँगै बढ्यो नेप्से, दुई कम्पनीमा सकारात्मक सर्किट

काठमाडौँ: साताको अन्तिम कारोबार दिन सेयर बजारमा दोहोरो अंकको वृद्धि भएको छ। बिहीबार नेप्से परिसूचक २३.८७ अंकले बढेर २ हजार ८२०.४४ विन्दुमा उक्लिएको छ। चुनावपछि खुलेको बजारमा सोमबार लगातार तीन सर्किट लागे पनि बुधबार ४६.७८ र मंगलबार ३२.०८ अंकले घटेको थियो।

यसदिन कारोबार रकम पनि बढेको छ। बिहीबार १ लाख ३० हजार १५ पटकमा १४ अर्ब ५५ करोड १९ लाख रुपैयाँको ४ करोड १६ लाख ८६ हजार ४ सय ५ कित्ता सेयर किनबेच भएको छ।

आज १७६ कम्पनीको सेयर मूल्य बढ्दा ७७ कम्पनीको मूल्य घटेको छ भने ९ कम्पनीको मूल्य स्थिर रह्यो। होटल तथा पर्यटन, नीर्जिवन बीमा र अन्य उपसमूहबाहेक सबै उपसमूहको सेयरमूल्य आज उकालो लागेको छ।

बिहीबार दुई कम्पनीको सेयरमा सकारात्मक सर्किट लागेको छ। साल्पा विकास बैंक र रिलायन्स स्पिनिङ मिल्सको सेयरमूल्य १० प्रतिशतले बढेको हो। नेसनल हाइड्रो, होटल फरेस्ट इन र दरमखोला हाइड्रो इनर्जीको सेयरमूल्य ९ प्रतिशतभन्दा ज्यादा वृद्धि भएको छ।

आज गुमाउने लगानीकर्ताले पनि थोरैले गुमाएका छन्। सबैभन्दा बढी कुमारी सबल योजनाको सेयर मूल्य ३.७२ प्रतिशतले घटेको छ।