आजदेखि ‘ग्लोबल मनि विक २०२६’ मनाउँदै धितोपत्र बोर्ड, सचेत लगानीका लागि आग्रह

काठमाडौँः नेपाल धितोपत्र बोर्ड (सेबोन)ले चैत २ गते (आज)देखि ‘ग्लोबल मनि विक २०२६’ सुरु गरेको छ। एक सातासम्म सञ्चालन हुने यस कार्यक्रममार्फत बोर्डले लगानीकर्तालाई सचेत, सूचनामूलक र जिम्मेवार ढंगले सेयर बजारमा सहभागी हुन आग्रह गरेको छ।

कार्यक्रमको सुरुवातसँगै बोर्डले विशेषगरी युवा तथा नयाँ लगानीकर्तालाई लक्षित गर्दै लगानी गर्नुअघि पर्याप्त अध्ययन र विश्लेषण गर्नुपर्नेमा जोड दिएको छ। बोर्डका अनुसार दोस्रो बजारमा कारोबार गर्दा सूचीकृत कम्पनीका आधिकारिक विवरण, वित्तीय अवस्था, लाभांश घोषणा, व्यवस्थापन परिवर्तन लगायतका सूचनाको आधारमा मात्र निर्णय लिनुपर्छ।

बोर्डले सामाजिक सञ्जालमा फैलिएका अनुमान, हल्ला वा अप्रमाणित सूचनाका आधारमा लगानी नगर्न चेतावनी दिएको छ। यस्ता माध्यमबाट हुने भ्रामक सूचना, जालसाजी तथा छलकपटबाट बच्न लगानीकर्ता स्वयं सतर्क हुनुपर्ने बताइएको छ।

त्यसैगरी, इन्साइडर ट्रेडिङ, कर्नरिङ तथा सेयर मूल्यमा अस्वाभाविक उतारचढाव ल्याउने गतिविधिबाट टाढा रहन बोर्डले आग्रह गरेको छ। बजारमा देखिने उच्च प्रतिफलको प्रलोभनमा नपर्न र हतारमा निर्णय नगर्न पनि सुझाव दिइएको छ।

बोर्डले लगानीकर्तालाई प्राथमिक बजारबाट लगानी सुरु गर्न, कम्पनीको विवरणपत्र तथा वित्तीय सूचकहरूको अध्ययन गर्न र दीर्घकालीन दृष्टिकोणसहित लगानी गर्न सुझाव दिएको छ। साथै, लगानी विविधीकरण, जोखिम व्यवस्थापन र आपतकालीन कोषको व्यवस्था गर्न पनि जोड दिइएको छ।

देशको समग्र आर्थिक अवस्था, बैंकिङ प्रणालीको तरलता, ब्याजदर र मुद्रास्फीतिले पूँजी बजारमा प्रभाव पार्ने भएकाले यस्ता सूचकहरूबारे जानकारी राख्नुपर्ने बोर्डको भनाइ छ।

धितोपत्र कारोबार गर्दा बैंकमार्फत मात्र भुक्तानी गर्न, अनुमति प्राप्त धितोपत्र व्यवसायीमार्फत कारोबार गर्न तथा आधिकारिक जानकारीका लागि सीडीएससी, नेप्से, धितोपत्र बोर्ड, नेपाल राष्ट्र बैंक र अर्थ मन्त्रालयका वेबसाइट प्रयोग गर्न पनि बोर्डले आग्रह गरेको छ।

बोर्डले लगानीकर्तालाई कुनै जिज्ञासा वा गुनासो भए सम्बन्धित निकायमा सम्पर्क गर्नसमेत अनुरोध गरेको छ।