सेयर बजारमा सर्किट ब्रेकमा नयाँ नियम, आफ्टर–मार्केट अर्डरको तयारी

काठमाडौँ: सेयर बजारको उतारचढाव व्यवस्थापन गर्न नेपाल धितोपत्र बोर्डले सर्किट ब्रेकरसम्बन्धी नियममा हेरफेर गरेको छ। बोर्डले धितोपत्र कारोबारसम्बन्धी विनियमावली संशोधन स्वीकृत गरेसँगै अब बजारमा लागू हुने सर्किट ब्रेकरको दायरा परिवर्तन हुने भएको हो।

नयाँ व्यवस्थाअनुसार नियमित कारोबारमा नेप्से परिसूचकको चाल अनुसार सर्किट ब्रेकरको सीमा न्यूनतम ५ प्रतिशतदेखि अधिकतम ८ प्रतिशतसम्म निर्धारण गरिएको छ। यसअघि न्यूनतम ४ प्रतिशत र अधिकतम ६ प्रतिशतमा सर्किट ब्रेकको नियम थिए।

नेपाल स्टक एक्सचेन्जले प्रस्ताव गरेको संशोधित विनियमावलीलाई बोर्डले चैत २३ गतेको सञ्चालक समिति बैठकबाट स्वीकृत गरेपछि नयाँ ढाँचा लागू हुने बाटो खुलेको हो। नयाँ प्रस्तावअनुसार कारोबार सुरु भएको पहिलो घण्टाभित्र नेप्से परिसूचक ५ प्रतिशतले तलमाथि भएमा १५ मिनेटका लागि कारोबार रोकिनेछ। त्यसपछि पुनः कारोबार सुरु भई परिसूचक ८ प्रतिशतसम्म पुगेमा भने सो दिनका लागि सम्पूर्ण कारोबार बन्द गरिने व्यवस्था राखिएको छ।

यससँगै विशेष प्रि–ओपनिङ सेसनमा पनि परिवर्तन गरिएको छ। पहिले २ प्रतिशतसम्मको उतारचढाव अनुमति दिइएकोमा अब ३ प्रतिशतसम्म सीमित गर्ने निर्णय भएको छ।

कम्पनीको व्यक्तिगत सेयर मूल्यमा हुने दैनिक परिवर्तनको सीमामा पनि विस्तार गर्ने तयारी गरिएको छ। हाल अधिकतम १० प्रतिशतसम्मको दायरा रहेकोमा यसलाई १५ प्रतिशतसम्म पुर्‍याउने योजना बोर्डले अघि सारेको स्रोतको भनाइ छ।

अर्कोतर्फ, लगानीकर्तालाई थप सहज बनाउन बजार समयबाहिर पनि अर्डर राख्न मिल्ने नयाँ अभ्यास ल्याइने भएको छ। ‘आफ्टर मार्केट अर्डर’ प्रणालीमार्फत साँझ ६ बजेदेखि भोलिपल्ट बिहान ६ बजेसम्म खरिद–बिक्रीका अर्डर दिन सकिने व्यवस्था तयारीमा छ।

हाल भने लगानीकर्ताले बिहान १०:३० बजेदेखि सुरु हुने स्पेशल प्रि–ओपनिङ सेसनमा मात्र अर्डर राख्न पाउने व्यवस्था छ, जसको कारोबार ११ बजेसम्म चल्छ। त्यसपछि नियमित कारोबार ३ बजेसम्म सञ्चालन हुने गरेको छ।