स्टक डिलरलाई कम्पनी छनोटमा पूर्वस्वीकृति नचाहिने, नेप्सेले गर्यो कार्यविधि संशोधन

काठमाडौं। नेपाल स्टक एक्सचेन्ज (नेप्से) ले स्टक डिलरसम्बन्धी कार्यविधि संशोधन गर्दै कारोबार गर्ने कम्पनी छनोटमा पूर्वस्वीकृति लिनुपर्ने व्यवस्था हटाएको छ। यससँगै अब स्टक डिलरहरूले आफूले कारोबार गर्न चाहेको कम्पनीको सूची नेप्सेलाई जानकारी गराए मात्र पुग्नेछ।

नेप्सेले धितोपत्र व्यापारी (स्टक डिलर) कार्यसञ्चालन सम्बन्धी कार्यविधि, २०७७ मा पहिलो संशोधन गर्दै यस्तो व्यवस्था लागू गरेको हो। यसअघि स्टक डिलरहरूले नेप्सेले तयार पारेको सूचीबाट कम्पनी छनोट गरी स्वीकृतिका लागि पेश गर्नुपर्ने व्यवस्था थियो भने सूची हेरफेर गर्न पनि पूर्वस्वीकृति आवश्यक पर्थ्यो।

यससँगै अन्य व्यवस्थाहरूमा पनि परिमार्जन गरिएको छ। अब स्टक डिलरहरूले सेयरका अतिरिक्त सरकारी ऋणपत्र, म्युचुअल फण्ड र डिबेन्चरमा समेत कारोबार गर्न पाउने भएका छन्। त्यस्तै, लगातार तीन वर्ष नाफामा रहेका कम्पनीको सेयर मात्र खरिद गर्नुपर्ने पुरानो प्रावधान हटाउँदै अब नाफामा नरहेका कम्पनीको सेयर पनि खरिद गर्न सकिने भएको छ।

कम्पनी छनोटसम्बन्धी मापदण्डमा पनि परिवर्तन गरिएको छ। स्टक डिलरले खरिद गर्न सक्ने कम्पनीको न्यूनतम चुक्ता पुँजी २० करोडबाट बढाएर २५ करोड रुपैयाँ पुर्याइएको छ। साथै, विगतमा रहेको ८० प्रतिशत कारोबार दिन पुगेका कम्पनीको सेयर मात्र खरिद गर्नुपर्ने व्यवस्था हटाइएको छ। तर, अब कम्तीमा ६ महिना सूचीकृत भएका कम्पनीको सेयर मात्र खरिद गर्न पाइने नयाँ प्रावधान लागू गरिएको छ।

संशोधनअनुसार स्टक डिलरले दैनिक रूपमा गर्न सक्ने खुद कारोबार रकम आफ्नो नेटवर्थको अधिकतम ६० प्रतिशतसम्म पुर्‍याउन पाउनेछन्। यसले बजारमा तरलता अभिवृद्धि गर्ने अपेक्षा गरिएको छ।

हाल नेपालमा नागरिक स्टक डिलर र नबिल स्टक डिलर गरी दुई स्टक डिलर कम्पनी सञ्चालनमा रहेका छन्। नेप्सेको यो संशोधनले पुँजीबजारलाई थप पारदर्शी, चलायमान र व्यवस्थित बनाउने विश्वास गरिएको छ।