साताको सेयर समीक्षाः अर्थमन्त्रीसँगको भेटले पनि बजारमा आएन चमक

काठमाडौं। यो साता सेयर बजार समग्रमा मिश्रित गतिमा अघि बढ्दै अन्ततः घटेर बन्द भएको छ। कारोबार भएका दिनहरूमा बजार कहिले उकालो लाग्यो त कहिले ओरालो।

तर, साताको अन्त्यतिर भने बजार घटेर बन्द भयोे। यो हप्ता सेयर कारोबार पनि ६ दिन भएको छ। सरकारले पेट्रोलियम पदार्थको खपत घटाउन शनिवार र आइतबार सर्वजनिक विदा दिने निर्णय गरेसंगै अब आइतबारको साटो शुक्रबार सेयर कारोबार भएको छ।

बजारको दैनिक अवस्था

साताको पहिलो कारोबार दिन आइतबार बजार १०० अंक भन्दा बढीले घटेर बन्द भयो। नेपाल स्टक एक्सचेञ्ज (नेप्से) परिसूचक १०५.५० अंकले घटेर २ हजार ६७२ विन्दुमा पुगेको थियो। सो दिन १२ अर्ब रुपैयाँभन्दा बढीको कारोबार भएको थियो।

सोमबार भने अर्थमन्त्री डा.स्वर्णिम वाग्लेको आस्वासनले बजार उच्च अंकले बढ्यो। लगानीकर्ताले नयाँ सरकारले सेयर बजारलाई बेवास्ता गरेको गुनासो गरिरहेका थिए।

अर्थमन्त्री वाग्लेले सोमबार बिहान स्टक ब्रोकरसँग छलफल गरेका थिए। उनले बजारबारे सकारात्मक अभिव्यक्ति दिएसँगै बजारमा केही सकरात्मक प्रभाव देखियो। तर, बजारमा सोचेको जस्तो चमक आएन्।

योसँगै सोमबार नेप्से ८३.३३ अंकले बढेर २७६०.०२ विन्दुमा पुगेर बन्द भएको थियो। त्यसदिन १० अर्ब ९२ करोडको कुल कारोबार भयो।

मंगलबार भने बजारमा सामान्य अंकले घट्यो। मंगलबार सेयर बजार २.६१ अंक घटेर परिसूचक नेप्से २७५७ अंकमा कायम भएको थियो। यसदिन नेप्सेसँगै कारोबार रकम घटेर ६ अर्ब ७३ करोडमा सिमित भएको थियो।

बुधबार बढेर सेयर बजारले २८ सय अंक पार गर्यो। यस दिन नेप्से ४५.१२ अंक बढेको थियो। सो वृद्धिपछि नेप्से परिसूचक २८०२ अंकमा कायम भएको थियो। यस दिन ८ अर्ब ३१ करोडको कारोबार भएको थियो।

बिहीबार सेयर बजार ४८.७१ अंक बढेको थियो। यससँगै बजार २८५१ अंकमा पुगेको हो। यसदिन ९ अर्ब ९१ करोडको कारोबार भएको थियो।

साताको अन्तिम कारोबार दिन शुक्रबार नेप्से सूचक दोहोरो अंकले घटेको छ। आज नेप्से सूचक १३.४६ अंकले घटेर २ हजार ८३७.७७ विन्दुमा बन्द भएको हो।

आज २ करोड १० लाख कित्ता सेयर खरिद–बिक्री हुँदा ८ अर्ब ९९ करोड ३२ लाख रुपैयाँ बराबरको कारोबार भएको छ।

सरकारले पेट्रोलियम पदार्थको खपत घटाउन शनिवार र आइतबार सर्वजनिक विदा दिने निर्णय गरेसंगै अब आइतबारको साटो शुक्रबार सेयर कारोबार भएको हो।

आईपीओ सम्बन्धी गतिविधि

यस साता शिखर पावर डेभलपमेन्ट कम्पनीको साधारण सेयर (आईपीओ) बाँडफाँड भएको छ। कुल २६ लाखभन्दा बढी आवेदकले आवेदन दिएका थिए।

जसमध्ये २६ लाख ५० हजार आवेदन स्वीकृत भएका छन्। भाग्यशाली एक लाख ८४ हजारभन्दा बढी लगानीकर्ताले १० कित्ताका दरले सेयर प्राप्त गरेका छन्।

एफपीओ तथा बोनस सेयर

यस साता विजय लघुवित्त वित्तीय संस्थाको थप निष्कासन (एफपीओ) नेप्सेमा सूचीकृत भएको छ। कुल चार लाख ६६ हजारभन्दा बढी कित्ता सेयर दोस्रो बजारमा कारोबारका लागि खुला गरिएको छ।

त्यसैगरी विभिन्न कम्पनीहरूको बोनस सेयर पनि सूचीकृत भएका छन्। हाइड्रो इन्भेस्टमेन्ट एन्ड डेभलपमेन्ट कम्पनी लिमिटेड (एचआइडिसीएल), ङादी ग्रुप पावर, यूनाइटेड इदि मर्दि आरबी हाइड्रोपावर, एनआरएन तथा शाइन रेसुङ्गा डेभलपमेन्ट बैंकका बोनस सेयर नेप्सेमा थपिएका छन्।

समग्रमा हेर्दा यो साता सेयर बजारमा उतारचढाव भए पनि अन्तिम दिनको मजबुत प्रदर्शनले लगानीकर्तामा सकारात्मक संकेत दिएको छ।

उच्च कारोबार रकम र सक्रिय सहभागिताले बजारमा विश्वास कायमै रहेको देखिन्छ। आगामी साता बजारको दिशा लगानीकर्ताको मनोबल, नीतिगत निर्णय र नयाँ निष्कासनले निर्धारण गर्ने सम्भावना छ।