चन्द्रागिरी इन्भेष्टमेन्ट ग्रुपले आईपीओ निष्काशन गर्ने

काठमाडौँः चन्द्रागिरी इन्भेष्टमेन्ट ग्रुप लिमिटेडले सर्वसाधारणका लागि प्रारम्भिक सार्वजनिक निष्काशन (आईपीओ) जारी गर्ने भएको छ। कम्पनीको शनिबार सम्पन्न पहिलो वार्षिक साधारणसभाले १० करोड रुपैयाँ बराबरको १० लाख कित्ता सेयर निष्कासन गर्ने प्रस्ताव पारित गरेको हो।

हाल कम्पनीको अधिकृत पूँजी ५० करोड रुपैयाँ रहेको छ। आईपीओ निष्कासनको निर्णयसँगै कम्पनीले सर्वसाधारणलाई आफ्नो लगानीमा सहभागी गराउने प्रक्रिया अघि बढाएको जनाएको छ।

साधारणसभाले गत आर्थिक वर्षको मुनाफाबाट सेयरधनीहरूलाई चुक्ता पूँजीको ४ प्रतिशतका दरले नगद लाभांश वितरण गर्ने प्रस्ताव पनि अनुमोदन गरेको छ।

त्यसैगरी, सभाले आगामी कार्यकालका लागि ६ सदस्यीय नयाँ सञ्चालक समिति निर्विरोध निर्वाचित गरेको छ। निर्वाचित हुनेहरूमा राजन श्रेष्ठ, रामराजा आचार्य, प्रकाशमान श्रेष्ठ, धिरेन्द्र श्रेष्ठ, शंकर महर्जन र बीरेन्द्र श्रेष्ठ रहेका छन्।

सभामा अध्यक्ष राजन श्रेष्ठले प्रस्तुत गरेको वार्षिक प्रतिवेदन तथा लेखापरीक्षकको प्रतिवेदन सर्वसम्मतिले पारित भएको थियो।

होल्डिङ कम्पनीका रूपमा रहेको कम्पनीले विभिन्न क्षेत्रमा लगानी विस्तार गर्दै आएको छ। कम्पनीको लगानी रहेका संस्थाहरूमा इन्द्रेणी मस्रुम फार्म, द निलय होटल्स लिमिटेड, काउले भाइनियार्ड एग्रो, एभरेष्ट कलर र मेरो किसान लगायत रहेका छन्।

कम्पनीले आईपीओ निष्कासनपश्चात संकलित पूँजीलाई थप उत्पादनशील क्षेत्रमा परिचालन गर्ने लक्ष्य राखेको जनाएको छ।