धितोपत्र बोर्डद्वारा दुई कम्पनीलाई आईपीओ निष्काशनको अनुमति

काठमाडौँः नेपाल धितोपत्र बोर्डले एभरेष्ट कलर लिमिटेड र सर्वोत्तम पेन्ट्स इण्डष्ट्रिज लिमिटेडलाई साधारण सेयर (आईपीओ) निष्काशनको अनुमति दिएको छ। बोर्डले वैशाख २ गते यी दुई कम्पनीलाई आईपीओ निष्काशनका लागि स्वीकृति प्रदान गरेको हो।

एभरेष्ट कलर लिमिटेडले ७ करोड ९० लाख रुपैयाँ बराबरको ७ लाख ९० हजार कित्ता आईपीओ जारी गर्नेछ। यस कम्पनीको आईपीओ बिक्री प्रबन्धकका रूपमा मुक्तिनाथ क्यापिटल नियुक्त गरिएको छ। २०६८ सालमा स्थापना भएको यस कम्पनीले नेपाली बजारमा रङ्ग उत्पादन तथा वितरण गर्दै आएको छ। कम्पनीले स्वदेशमै गुणस्तरीय पेन्ट उत्पादन गरी आयात प्रतिस्थापन गर्ने, रोजगारी सिर्जना गर्ने र आन्तरिक राजस्वमा योगदान पुर्‍याउने लक्ष्य राखेको जनाएको छ।

त्यस्तै, सर्वोत्तम पेन्ट्स इण्डष्ट्रिज लिमिटेडले ८ करोड ५० लाख रुपैयाँ बराबरको ८ लाख ५० हजार कित्ता शेयर निष्काशन गर्ने अनुमति पाएको छ। यसको आईपीओ निष्काशन तथा बिक्री प्रबन्धक ग्लोबल आईएमई क्यापिटल रहेको छ।

यी दुई कम्पनीले आईपीओ ल्याउने तयारीसँगै पुँजी बजारमा नयाँ लगानीका अवसर थपिने अपेक्षा गरिएको छ। साथै, उद्योग क्षेत्रमा निजी लगानी विस्तार हुने र उत्पादनमूलक क्षेत्रमा सकारात्मक प्रभाव पर्ने विश्वास गरिएको छ।