सर्वसाधारणका लागि सोपान फर्मास्युटिकल्सको आईपीओ खुला, यस्तो छ कम्पनीको वित्तीय अवस्था

काठमाडौँः सोपान फर्मास्युटिकल्स लिमिटेड ले आजदेखि सर्वसाधारणका लागि प्राथमिक सेयर (आईपीओ) निष्कासन गरेको छ । यसअघि वैशाख २ गतेदेखि निष्कासन गर्ने तय भएकोमा सरकारले आइतबार सार्वजनिक बिदा दिएका कारण निष्कासन एक दिन ढिलाइ भएको हो ।

यस आईपीओमा लगानीकर्ताले छिटोमा वैशाख ८ गतेसम्म र ढिलोमा वैशाख १७ गतेसम्म आवेदन दिन सक्नेछन् । कम्पनीले आफ्नो जारी पूँजीको २५ प्रतिशत अर्थात् ४२ लाख ९० हजार कित्ता सेयर निष्कासन गर्न नेपाल धितोपत्र बोर्ड बाट अनुमति पाएको थियो । जसमध्ये वैदेशिक रोजगारीमा रहेका नेपालीका लागि ४ लाख २९ हजार कित्ता बाँडफाँट भइसकेको छ । बाँकीमध्ये कर्मचारी र सामूहिक लगानी कोषलाई छुट्याएर ३४ लाख ७४ हजार ९०० कित्ता शेयर सर्वसाधारणका लागि खुला गरिएको हो ।

वित्तीय अवस्था र पूँजी संरचना

कम्पनीको वित्तीय अवस्था मध्यम रूपमा सन्तोषजनक देखिन्छ । चालु आर्थिक वर्षको दोस्रो त्रैमासको अपरिष्कृत विवरणअनुसार कम्पनी ३३ करोड ८० लाख रुपैयाँभन्दा बढी सञ्चित नाफामा रहेको छ । आर्थिक वर्ष २०८१÷८२ को अन्त्यसम्म कम्पनीको प्रतिसेयर नेटवर्थ ९२ रुपैयाँ १५ पैसा र प्रतिसेयर आम्दानी १८ रुपैयाँ ३३ पैसा रहेको छ ।

आईपीओ निष्कासन र बाँडफाँटपछि कम्पनीको चुक्तापूँजी १ अर्ब ७१ करोड ६० लाख रुपैयाँ पुग्नेछ । जसमा संस्थापकको हिस्सा ७५ प्रतिशत र सर्वसाधारणको २५ प्रतिशत रहनेछ । आईपीओबाट संकलित रकम बैंक ऋण भुक्तानी, नयाँ परियोजना विस्तार तथा चालु पूँजी व्यवस्थापनमा प्रयोग गर्ने योजना कम्पनीको छ ।

जोखिम र आवेदन प्रक्रिया

कम्पनीको आईपीओमा न्यूनतम १० कित्तादेखि अधिकतम ११ हजार कित्तासम्म आवेदन दिन सकिनेछ । केयर रेटिङ्ग नेपालले कम्पनीलाई ‘केयर(एनपी बी इश्यूअर रेटिङ’ प्रदान गरेको छ, जसले वित्तीय दायित्व वहन गर्ने क्षमतामा उच्च जोखिम रहेको संकेत गर्छ । त्यसैले लगानीकर्तालाई रेटिङ्गको विश्लेषण गरेर मात्र लगानी गर्न सुझाव दिइएको छ ।

लगानीकर्ताले सी–आस्बा सदस्य बैंक तथा वित्तीय संस्था र ‘मेरो शेयर’ प्रणालीमार्फत अनलाइन आवेदन दिन सक्नेछन् । यसको बिक्री प्रबन्धकको जिम्मेवारी एनएमबि क्यापिटल लिमिटेड ले लिएको छ ।

दोस्रो बजारमा ओपनिङ रेन्ज

नेपाल स्टक एक्सचेञ्ज (नेप्से) को नयाँ नियम (२०८२ फागुन १ देखि लागू) अनुसार, यदि कम्पनीको नेटवर्थ १०० रुपैयाँभन्दा कम छ भने सोही नेटवर्थलाई आधार मानेर पहिलो कारोबार मूल्य निर्धारण गरिन्छ । सोपान फर्मास्युटिकल्सको नेटवर्थ ९२ रुपैयाँ १५ पैसा रहेकाले यसको पहिलो कारोबारका लागि न्यूनतम ९२ रुपैयाँ १५ पैसा देखि अधिकतम २७६ रुपैयाँ ४५ पैसा सम्मको ओपनिङ रेन्ज तोकिने सम्भावना छ ।

ललितपुरको महालक्ष्मीस्थानमा कार्यालय रहेको कम्पनीले २०७८ सालदेखि औषधि उत्पादन गर्दै आएको छ र हालसम्म १३९ प्रकारका औषधिको उत्पादन अनुमति प्राप्त गरिसकेको छ ।