आजदेखि सेयरबजारमा यी नयाँ व्यवस्था लागू हुँदै

काठमाडौँः वैशाख ७ गते (आज)देखि सेयरबजारमा विभिन्न नयाँ नियम लागू भएको छ। नेपाल स्टक एक्सचेन्ज नेप्सेले सर्किट ब्रेक र सेयर मूल्य परिवर्तन सीमा परिवर्तन गरेको हो भने पुँजीबजारको इतिहास मै पहिलो पटक आफ्टर मार्केट अर्डरको व्यवस्था गरिएको छ ।

यी व्यवस्था परिमार्जनको लागि नेप्सेले ‘धितोपत्र कारोबार सञ्चालन विनियमावली, २०७५’ मा संशोधनको प्रस्ताव गर्दै नेपाल धितोपत्र बोर्डमा पठाएको थियो । धितोपत्र बोर्डको चैत्र २३ गते बसेको संचालक समितिको बैठकले विनियमावलीमा संशोधन गर्ने प्रस्ताव स्वीकृत दिएको थियो । नेप्सेको वैशाख ३ गते बसेको संचालक समितिको बैठकले वैशाख ७ गतेदेखि यी व्यवस्था लागू गर्ने निर्णय गरेको नेप्सेका प्रवक्ता मुराहरी मराजुलीले बताएका छन्।

शेयर मूल्य १५ प्रतिशतसम्म घटबढ हुन पाउने

त्यस्तै अब आजदेखि एक दिनमा कुनै एउटा शेयरको मूल्य १५ प्रतिशतसम्म घटबढ हुन सक्ने छ। नियमित कारोबार समयमा अहिले सेयर मूल्य अधिकतम १० प्रतिशतसम्म घटबढ हुन सक्ने व्यवस्था छ। अब भने त्यसलाई बढाएर नियमित समयमा १५ प्रतिशतसम्म सेयर मूल्य घटबढ हुन सक्ने व्यवस्था गरिएको हो ।

प्रत्येक कारोबारमा सेयर मूल्य ३ प्रतिशतले घटबढ हुन पाउने

अब आजदेखि नियमित समयमा हुने प्रत्येक कारोबारमा शेयर मूल्य ३ प्रतिशतले घटबढ हुन पाउने छ । यस अघि २ प्रतिशत घटबढ हुन सक्ने गरि अर्डर हाल्न पाउने तथा सोहि बमोजिम घटबढ हुन सक्ने व्यवस्था थियो। अब भने सो २ प्रतिशतको सीमालाई बढाएर ३ प्रतिशत कायम गरिएको हो ।

प्रि ओपनमा सेयर मूल्य ५ प्रतिशतसम्म घटबढ हुन पाउने

अब प्रि ओपन सेसनमा शेयर मूल्य ५ प्रतिशतले घटबढ हुन पाउने छ । हाल प्रि ओपन सेसनमा शेयर मूल्य २ प्रतिशत मात्र घटबढ हुन सक्ने व्यवस्था रहेकोमा अब त्यसलाई बढाएर ५ प्रतिशत कायम गरिएको हो । प्रि ओपन सेसन बिहान १०ः३० देखि १०ः४५ बजेसम्म संचालन हुने गर्दछ ।

समग्र बजार ८ प्रतिशतसम्म घटबढ हुन पाउने

अब आजदेखि समग्र बजारमा लाग्ने सर्किट ब्रेकको नियम पनि परिवर्तन भएको । हाल समग्र बजारमा ४ प्रतिशतको परिवर्तन भएमा पहिलो, ५ प्रतिशतको परिवर्तन भएमा दोस्रो र ६ प्रतिशतको परिवर्तन भएमा तेस्रो तथा सर्किट ब्रेक लाग्दै आएको छ। अब भने बजारमा दुई वटा मात्र सर्किट ब्रेकको सीमा रहने छ। अब बजार दोस्रो घण्टा भित्र ५ प्रतिशत घटबढ भएमा पहिलो सर्किट ब्रेक लाग्ने छ र १५ मिनेटको लागि कारोबार स्थगित हुने छ। त्यसपछि बजार ८ प्रतिशत घटबढ भएमा दोस्रो तथा अन्तिम सर्किट ब्रेक लाग्ने छ, र सो दिनको लागि सम्पूर्ण कारोबार स्थगित हुने छ।

नेप्सेले यी व्यवस्था आज वैशाख ७ गते सोमबारदेखि लागू हुने गरि मिति तोकेको हो। यी व्यवस्था लागु हुँदा बजारमा नयाँ आयाम थपिने, तथा नयाँ उर्जाको साथै बजारप्रतिको विश्वास बढ्ने अपेक्षा गरिएको छ।