एभरेष्ट बैंकको वितरणयोग्य नाफा चार अर्ब भन्दा बढी

काठमाडौँः एभरेष्ट बैंकले चालू आर्थिक वर्षको तेस्रो त्रैमाससम्मको वित्तीय विवरण सार्वजनिक गरेको छ। सार्वजनिक विवरणअनुसार बैंकको खुद नाफा अघिल्लो वर्षको सोही अवधिको तुलनामा केही घटेको देखिएको छ।

चालु आर्थिक वर्षको चैत मसान्तसम्म बैंकले करिब तीन अर्ब ३२ करोड रुपैयाँ खुद नाफा आर्जन गरेको छ। जुन गत वर्षको सोही अवधिको तुलनामा झण्डै ३.७ प्रतिशत कम हो। अघिल्लो वर्ष यही अवधिमा बैंकको नाफा तीन अर्ब ४५ करोड रुपैयाँभन्दा बढी थियो।

बैंकको खुद ब्याज आम्दानीमा सामान्य वृद्धि भए पनि इम्पेयरमेन्ट चार्ज उल्लेख्य रूपमा बढ्दा समग्र नाफामा दबाब परेको देखिन्छ। इम्पेयरमेन्ट चार्ज अघिल्लो वर्षको करिब २७ करोडबाट बढेर यस वर्ष ७७ करोड रुपैयाँभन्दा माथि पुगेको छ।

समीक्षा अवधिमा बैंकको खुद ब्याज आम्दानी १.३३ प्रतिशत बढेको छ। खुद फि तथा कमिशन आम्दानी ३२.४९ प्रतिशत बढेको छ। यद्यपि, बैंकको कुल सञ्चालन आम्दानी ९.२२ प्रतिशत बढेको छ।

नाफामा आएको कमीको असर प्रतिसेयर आम्दानीमा पनि परेको छ। बैंकको इपीएस घटेर करिब ३२ रुपैयाँमा झरेको छ। त्यस्तै, प्रतिसेयर नेटवर्थ २४४ रुपैयाँभन्दा बढी रहेको छ भने पी रेसियो २१ गुणाभन्दा माथि छ।

बैंकको वितरणयोग्य नाफा भने चार अर्ब रुपैयाँभन्दा बढी पुगेको छ। हाल बैंकको चुक्ता पूँजी १३ अर्बभन्दा बढी रहेको छ भने जगेडा कोषमा झण्डै २० अर्ब रुपैयाँ सञ्चित छ। निक्षेप संकलन तीन खर्ब बढी हुँदा कर्जा लगानी करिब २.५ खर्ब रुपैयाँ पुगेको छ।