एनआईसी एशिया बैंकमा रोजगारीको अवसर

काठमाडौँः एनआईसी एशिया बैंक लिमिटेडले प्रमुख सुरक्षा अधिकृत पदमा एक जना कर्मचारी नियुक्त गर्ने भएको छ । बैंकले योग्य, अनुभवी तथा नतिजामुखी उम्मेदवारबाट उक्त पदका लागि आवेदन आह्वान गरेको हो ।

बैंकले सार्वजनिक गरेको सूचनाअनुसार उक्त पद करार सेवाअन्तर्गत रहनेछ । बैंकको समग्र सुरक्षा व्यवस्थापनलाई प्रभावकारी बनाउने उद्देश्यसहित प्रमुख सुरक्षा अधिकृत नियुक्त गर्न लागिएको हो ।

नियुक्त हुने प्रमुख सुरक्षा अधिकृतले बैंकका कर्मचारी, ग्राहक, कार्यालय, सम्पत्ति तथा समग्र बैंकिङ कारोबारको सुरक्षा सुनिश्चित गर्ने जिम्मेवारी पाउनेछन् । उनले बैंकको सुरक्षा नीति, रणनीति तथा कार्यविधि तयार गरी कार्यान्वयन गर्नुपर्नेछ । साथै बैंकका शाखा कार्यालय, कर्पोरेट कार्यालय, एटीएम, नगद कारोबार हुने स्थान तथा अन्य भौतिक सम्पत्तिको सुरक्षा व्यवस्थापन गर्नुपर्नेछ ।

त्यस्तै, सम्भावित सुरक्षा जोखिम तथा खतराको पहिचान, मूल्यांकन र न्यूनीकरण गर्ने, सुरक्षा कर्मचारी तथा बाह्य सुरक्षा सेवा प्रदायकको व्यवस्थापन गर्ने र सीसीटीभी, अलार्म तथा प्रवेश नियन्त्रण प्रणालीको प्रभावकारी सञ्चालन सुनिश्चित गर्ने जिम्मेवारी पनि उक्त पदमा रहनेछ ।

आपत्कालीन अवस्था तथा संकट व्यवस्थापनका योजना तयार गर्ने, सुरक्षा जोखिम देखिएमा तत्काल आवश्यक कदम चाल्ने र नेपाल प्रहरी, सशस्त्र प्रहरी बललगायत सम्बन्धित सरकारी निकायसँग समन्वय गर्ने कामसमेत प्रमुख सुरक्षा अधिकृतले गर्नुपर्नेछ । यसका अतिरिक्त बैंकका विभिन्न कार्यालय तथा संरचनाको सुरक्षा निरीक्षण र अडिट गर्ने, सुरक्षा घटनाको अनुसन्धान गरी सुधारका उपाय सिफारिस गर्ने तथा बैंकको उच्च व्यवस्थापनलाई सुरक्षा जोखिम र रणनीतिक आवश्यकताबारे सुझाव दिने जिम्मेवारी पनि तोकिएको छ ।

उक्त पदका लागि व्यवस्थापन, सुरक्षा व्यवस्थापन, कानुन वा सम्बन्धित विषयमा स्नातक तह उत्तीर्ण गरेको हुनुपर्नेछ । साथै नेपाली सेना, नेपाल प्रहरी, सशस्त्र प्रहरी बल वा अन्य मान्यताप्राप्त सुरक्षा तथा कानुन कार्यान्वयन गर्ने निकायमा कम्तीमा १० वर्षको सम्बन्धित कार्यअनुभव आवश्यक पर्नेछ । वरिष्ठ पदमा रहेर काम गरेको अनुभव भएका उम्मेदवारलाई प्राथमिकता दिइने बैंकले जनाएको छ ।

बैंकिङ वा वित्तीय संस्थाको सुरक्षा व्यवस्थापनमा काम गरेको अनुभव भएका उम्मेदवारलाई थप प्राथमिकता दिइनेछ । उम्मेदवारसँग भौतिक सुरक्षा व्यवस्थापन, जोखिम मूल्यांकन तथा निगरानी प्रणालीसम्बन्धी राम्रो ज्ञान हुनुका साथै नेतृत्व क्षमता, संकट व्यवस्थापन, कर्मचारी व्यवस्थापन, विश्लेषणात्मक क्षमता, सञ्चार तथा निर्णय क्षमता हुनुपर्नेछ । उच्च नैतिकता, व्यावसायिकता, अनुशासन र गोपनीयता कायम गर्न सक्ने उम्मेदवारलाई प्राथमिकता दिइनेछ ।

उक्त पदमा इच्छुक तथा योग्यता पुगेका उम्मेदवारले बैंकको आधिकारिक करियर पोर्टलमार्फत अनलाइन आवेदन दिन सक्नेछन् । आवेदन दिने अन्तिम मिति सन् २०२६ नोभेम्बर १८ अर्थात् २०८३ मंसिर २ गते तोकिएको छ ।