सेबोन अध्यक्षका लागि आवेदन खुला, दरखास्त दिन सात दिन समय

काठमाडौँः सरकारले नेपाल धितोपत्र बोर्ड (सेबोन) को रिक्त अध्यक्ष पद पूर्तिका लागि आवेदन आह्वान गरेको छ। अर्थ मन्त्रालयअन्तर्गत गठित अध्यक्ष नाम सिफारिस समितिले सूचना जारी गर्दै योग्य नेपाली नागरिकलाई दरखास्त दिन आग्रह गरेको हो। अध्यक्ष सन्तोषनारायण क्षेष्ठको राजीनामा पछि अध्यक्ष पद रिक्त छ।

सूचना अनुसार इच्छुक उम्मेदवारहरूले प्रकाशित मितिले ७ दिनभित्र, अर्थात् वैशाख २१ गतेसम्म अर्थ मन्त्रालयको वित्तीय क्षेत्र व्यवस्थापन तथा संस्थान समन्वय महाशाखामा आवेदन बुझाइसक्नुपर्नेछ।

धितोपत्र सम्बन्धी ऐन, २०६३ बमोजिम अध्यक्ष पदका लागि उम्मेदवारले मान्यता प्राप्त विश्वविद्यालयबाट कम्तीमा स्नातकोत्तर उपाधि हासिल गरेको हुनुपर्नेछ। साथै, धितोपत्र बजार व्यवस्थापन, पुँजी बजार विकास, आर्थिक, वित्तीय, वाणिज्य, व्यवस्थापन वा कानुन क्षेत्रमा न्यूनतम ७ वर्षको व्यावसायिक अनुभव आवश्यक रहेको छ। आवेदन दिने व्यक्तिको उमेर ३० वर्ष पूरा भई ६५ वर्ष ननाघेको हुनुपर्नेछ।

भ्रष्टाचार, सम्पत्ति शुद्धीकरण, मानव बेचबिखन वा अन्य नैतिक पतन देखिने फौजदारी कसुरमा सजाय पाएका, प्रचलित कानुनअनुसार कालोसूचीमा परेका तथा विदेशी मुलुकको स्थायी आवासीय अनुमति लिएका व्यक्तिहरू यस पदका लागि अयोग्य ठहरिनेछन्।

आवेदनसँगै उम्मेदवारले व्यक्तिगत विवरण (सीभी), नेपाली नागरिकताको प्रतिलिपि, शैक्षिक योग्यता तथा अनुभवका प्रमाणपत्रहरू र अर्थ मन्त्रालयको वेबसाइटमा उपलब्ध स्वघोषणा फाराम अनिवार्य रूपमा पेस गर्नुपर्नेछ।

प्राप्त आवेदनहरूमध्येबाट सिफारिस समितिले कार्ययोजना र अन्तर्वार्ताको आधारमा संक्षिप्त सूची तयार गर्नेछ। अन्ततः समितिले सिफारिस गरेका उम्मेदवारहरूमध्येबाट सरकारले एक जनालाई सरकारले बोर्डको अध्यक्षमा नियुक्त गर्नेछ।