आईपीओ निष्काशन अनुमति माग्दै थप ६ कम्पनी बोर्डमा, कुन कम्पनीले कति सेयर ल्याउँदैछन्?

काठमाडौँः नेपाल धितोपत्र बोर्ड (सेबोन) मा  थप ६ कम्पनीले  प्राथमिक सेयर (आईपीओ) निष्काशनको अनुमति माग्दै आवेदन दिएका छन्। यी कम्पनीहरूले २०८३ साल जेठ महिनामा आईपीओ निष्काशनका लागि आवेदन पेश गरेका हुन्।

आवेदन दिने कम्पनीमध्ये दुई वटा जलविद्युत् क्षेत्रका छन् भने चार वटा उत्पादन तथा प्रशोधन क्षेत्रसँग सम्बन्धित छन्।

कुन कम्पनीले कति सेयर निष्काशन गर्न खोज्दैछ?

सुपर हेवा पावर कम्पनी लिमिटेडले १९ लाख २५ हजार कित्ता साधारण सेयर निष्काशनका लागि जेठ ७ गते आवेदन दिएको छ। कम्पनीको निष्काशन तथा बिक्री प्रबन्धक लक्ष्मी सनराइज क्यापिटल रहेको छ।

त्यसैगरी, रघुगंगा हाइड्रोपावर लिमिटेडले १ करोड ५० लाख कित्ता आईपीओ निष्काशन गर्न अनुमति माग्दै जेठ ८ गते आवेदन दिएको छ। कम्पनीको बिक्री प्रबन्धक एनआईसी एशिया क्यापिटल रहेको छ।

उत्पादन क्षेत्रअन्तर्गत राजेश मेटल क्राफ्ट्स लिमिटेडले ६० लाख कित्ता सेयर निष्काशनका लागि जेठ ७ गते आवेदन दिएको छ। यसको बिक्री प्रबन्धक नबिल इन्भेष्टमेन्ट बैंकिङ रहेको छ।

यस्तै, अन्नपूर्ण माछादाना उद्योग लिमिटेडले १० लाख ९ हजार ५३१ कित्ता सेयर निष्काशन गर्न सेबोनमा आवेदन दिएको छ। कम्पनीको बिक्री प्रबन्धक लक्ष्मी सनराइज क्यापिटल रहेको छ।

युवरानी एग्रो इन्डस्ट्रिज लिमिटेडले १६ लाख ५० कित्ता सेयर निष्काशनको अनुमति माग्दै जेठ ७ गते आवेदन दिएको छ। कम्पनीको बिक्री प्रबन्धक प्रभु क्यापिटल रहेको छ।

त्यसैगरी, प्रिमियर डिस्टिलरी लिमिटेडले २२ लाख ५० हजार कित्ता आईपीओ निष्काशनका लागि जेठ ८ गते आवेदन दिएको छ। कम्पनीको निष्काशन तथा बिक्री प्रबन्धक सिद्धार्थ सनराइज क्यापिटल रहेको छ।

सेबोनबाट स्वीकृति प्राप्त भएपछि यी कम्पनीहरूले सर्वसाधारणका लागि आईपीओ जारी गर्नेछन्। आवेदन स्वीकृतिको प्रक्रिया भने कम्पनीको वित्तीय अवस्था, नियामकीय मापदण्डको पालना तथा आवश्यक कागजातको मूल्याङ्कनपछि अघि बढ्नेछ।