बैंक तथा वित्तीय संस्थामा भ्रष्टाचार रोक्न नयाँ नीति ल्याउँदै राष्ट्र बैंक

काठमाडौं। नेपाल राष्ट्र बैंकले बैंक तथा वित्तीय संस्थामा घुस तथा भ्रष्टाचारविरुद्धको नीति (एन्टी ब्राइबरी एन्ड करप्सन पोलिसी) लागू गर्ने तयारी गरेको छ।

राष्ट्र बैंकका अनुसार अन्तर्राष्ट्रिय असल अभ्यास र नेपालमा विकसित सुशासनका मापदण्डलाई ध्यानमा राख्दै बैंकिङ क्षेत्रमा पारदर्शिता, जवाफदेहिता र सुशासन थप मजबुत बनाउन यो नीति ल्याउन लागिएको हो।

यो नीति लागू भएपछि बैंक तथा वित्तीय संस्थाले घुसखोरी, अनियमितता, हितको द्वन्द्व र भ्रष्टाचारजन्य गतिविधि रोक्न स्पष्ट आन्तरिक नीति तथा कार्यविधि अपनाउनुपर्नेछ। साथै, कर्मचारी र व्यवस्थापनले नैतिक आचरण पालना गर्ने, जोखिम व्यवस्थापनलाई प्रभावकारी बनाउने र शंकास्पद गतिविधिको निगरानी तथा नियन्त्रण गर्ने व्यवस्था गर्नुपर्ने अपेक्षा गरिएको छ।

राष्ट्र बैंकले यससम्बन्धी घुसखोरी तथा भ्रष्टाचारविरुद्धको नीतिको मस्यौदा तयार गरिसकेको जनाएको छ। आवश्यक सुझाव संकलन र स्वीकृतिपछि उक्त नीति कार्यान्वयनमा ल्याइनेछ।