मौद्रिक नीतिले पनि बढाउन सकेन सेयर बजार

काठमाडौँः मंगलबार आगामी आर्थिक वर्षको मौद्रिक नीति सार्वजनिक भएको थियो। मौद्रिक नीतिमा लचिलो नीतिहरुको अपेक्षा गरिरहेका लगानीकर्ताले खासै कुनै परिवर्तन र बजारलाई टेवा पुग्ने कुनै नीति नपाएपछि यस दिन बजार घट्न पुगेको छ। बुधबार नेप्से परिसूचक घटेर बन्द भएको छ। अघिल्लो कारोबार दिन अर्थात मंलबार बढेर बन्द भएको नेप्से, यस दिन भने घटेर बन्द भएको हो। यस दिन नेप्से परिसूचक ३०.०९ अंक घटेर २ हजार ६२१.५९ विन्दुमा झरेको छ।

नेप्से घटेपनि यस दिन कारोबार रकम भने बढेको छ। मंगलबार ४ अर्ब ४० करोड रुपैयाँबराबरको सेयर खरिदबिक्री भएकोमा यस दिन ४ अर्ब ८२ करोड ६० लाख ८४ हजार रुपैयाँबराबरको ८४ लाख ६३ हजार कित्ता सेयर खरिदबिक्री भएको छ।

यस दिन मूल्य बढेका स्टकहरुको वृद्धिदर ६ प्रतिशतभन्दा कम रहेको छ। कारोबारमा आएको कर्पोरेट डेभलपमेन्ट बैंकको शेयरमूल्य यस दिन सर्वाधिक १३.४१ प्रतिशत घटेको छ।

कारोबार रकमका आधारमा यस दिन ११ प्रतिशत केबिएल डिबेञ्चर २०८९ शीर्ष स्थानमा रहेको छ। उक्त डिबेञ्चरको मात्र ६२ करोड ३९ लाख रुपैयाँबराबरको सो ऋणपत्र कारोबार भएको छ।