दोहोरो अंकले घट्यो नेप्से, ४ अर्ब बढीको कारोबार

काठमाडौँः नेपाल स्टक एक्सचेञ्ज (नेप्से) परिसूचक लगातार दोस्रो कारोबार दिन पनि घटेर बन्द भएको छ। बुधबार ओरालो लागेको बजारले बिहीबार पनि गिरावटलाई निरन्तरता दिँदै १९.६७ अंकले घटेर २६०१.९२ विन्दुमा कायम भएको हो।

बजारमा कारोबार रकम भने ४ अर्ब रुपैयाँभन्दा माथि कायम रह्यो। ३६१ वटा कम्पनीको ५७ हजार ८६४ पटक भएको कारोबारमा ८७ लाख ५१ हजार कित्ता सेयर किनबेच हुँदा कुल ४ अर्ब ६१ करोड १९ लाख ५४ हजार रुपैयाँ बराबरको कारोबार भएको छ।

कारोबारका क्रममा उपकार लघुवित्त वित्तीय संस्थाको सेयर मूल्य सबैभन्दा धेरै १२.६८ प्रतिशतले बढेको छ। यता बीओके डिबेञ्चर २०८६ ‘क’ को मूल्य सबैभन्दा धेरै ८.६६ प्रतिशतले घटेको छ।

यस दिन कारोबारमा आएका सबै १३ उपसमूहका परिसूचक राताम्मे बने। सबैभन्दा बढी व्यापार उपसमूह २.३६ प्रतिशतले घट्दा विकास बैंक, उत्पादन तथा प्रशोधन र म्युचुअल फन्ड उपसमूहका परिसूचक पनि १ प्रतिशतभन्दा बढीले ओरालो लागेका छन्।

आज ग्लोबल आईएमई बैंक डिबेन्चर (२०८६ ८७)को सबैभन्दा बढी कारोबार भएको छ । उक्त ऋणपत्रको मात्र ३५ करोड ५८ लाखको कारोबार भएको छ ।