बालेन सरकार बनेयता सेयर ४०० अंक घट्यो,बजार ७ महिनाकै न्यून बिन्दुमा

काठमाडौँः केही महिनादेखि सेयर बजार लगातार दबाबमा छ। दबाबका कारण बजार निरन्तर ओरालो लागेको छ। सरकारको बजेट र नेपाल राष्ट्र बैंकको मौद्रिक नीतिलेसमेत सेयर बजारलाई विश्वास दिन सकेन्। नेपाल स्टक एक्सचेन्ज (नेप्से) सूचक सोमबार २ हजार ५७०.१८ बिन्दुमा बन्द हुँदै सात महिनायताकै न्यून स्तरमा झरेको छ।

राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह नेतृत्वको सरकार गठनपछि सेयर बजारमा सुधार आउने र नयाँ उचाइ कायम हुने अपेक्षा लगानीकर्ताको थियो। तर, त्यसविपरीत सरकार गठन भएयता नेप्से करिब ४०० अंक घटेको छ।

सरकारले शपथ लिनुअघि अर्थात् चैत १२ गते नेप्से २ हजार ९५०.१६ बिन्दुमा थियो। त्यसयता बजार निरन्तर दबाबमा रहँदै सोमबार २ हजार ५७०.१८ बिन्दुमा आइपुगेको हो।

यसअघि गत मंसिर ४ गते नेप्से २ हजार ५६० बिन्दुमा बन्द भएको थियो। त्यसपछि बजारले चैत ११ गते २ हजार ९७० बिन्दुसम्मको उच्च स्तर छोए पनि पछिल्ला महिनामा लगातार ओरालो लागेको देखिन्छ।

सेयर बजारको कारोबार हेर्दा बजेट सार्वजनिक भएपछि पनि बजारले सकारात्मक गति लिन सकेन। लगानीकर्ताले लामो समयदेखि उठाउँदै आएको पुँजीगत लाभकरलाई अन्तिम करका रूपमा कानुनी व्यवस्था गर्ने विषय यस वर्षको बजेटमा समेटिएको थियो।

गैरआवासीय नेपाली (एनआरएन) लाई सेयर बजारमा आकर्षित गर्ने, नेप्सेको पुनर्संरचनालगायत बजार सुधारका विभिन्न कार्यक्रम पनि घोषणा गरिएका थिए। ती व्यवस्थाले तत्काल बजारमा अपेक्षित प्रभाव पार्न सकेनन्।

अर्थमन्त्री डा. स्वर्णिम वाग्लेले बजेट प्रस्तुत गर्नुअघि जेठ १३ गते नेप्से २ हजार ७८२ बिन्दुमा बन्द भएको थियो। जेठ १५ गते बजेट सार्वजनिक भएपछि भएको पहिलो कारोबारमै नेप्से २६.७२ अंकले घटेर २ हजार ७५५ बिन्दुमा झरेको थियो। त्यसयता मात्रै पनि बजार करिब ८६ अंकले घटिसकेको छ।

बजेटपछि पनि बजारमा सुधार नआएपछि लगानीकर्ताको ध्यान नेपाल राष्ट्र बैंकको मौद्रिक नीतितर्फ केन्द्रित भएको थियो। तर, असार २३ गते सार्वजनिक भएको मौद्रिक नीतिले पनि सेयर बजारमा ठूलो उत्साह ल्याउन सकेन।

मौद्रिक नीतिमा राम्रो वित्तीय अवस्था र बलियो नेटवर्थ भएका कम्पनीको सेयर धितोमा तुलनात्मक रूपमा बढी कर्जा उपलब्ध गराउने व्यवस्था गरिएको छ। लगानीकर्ताले अपेक्षा गरेका केही नीतिगत सहुलियत नआएकाले बजारमा सकारात्मक प्रभाव सीमित देखिएको छ।