सेयर बजारमा ‘सर्ट सेलिङ’ प्रणाली ल्याउने तयारी, बजार घट्दा पनि लगानीकर्ताले कमाउन सक्ने

काठमाडौँः नेपाल धितोपत्र बोर्ड (सेबोन) ले नेपाली पुँजी बजारमा ‘सर्ट सेलिङ’ प्रणाली लागू गर्ने तयारी गरेको छ। यो व्यवस्था कार्यान्वयनमा आएपछि सेयर बजार बढ्दा मात्रै होइन, बजार घट्दा पनि लगानीकर्ताले प्रतिफल आर्जन गर्न सक्नेछन्।

बुधबार प्रतिनिधिसभाअन्तर्गतको अर्थ समितिको बैठकमा धितोपत्र बोर्डका अध्यक्ष डा. गोपालप्रसाद भट्टले पुँजी बजारलाई अन्तर्राष्ट्रिय अभ्यासअनुसार विकास गर्न सर्ट सेलिङ प्रणाली आवश्यक रहेको बताए।

उनका अनुसार हाल नेपाली सेयर बजारमा बजार निरन्तर बढिरहनुपर्छ भन्ने धारणा हावी छ। तर, कुनै पनि मुलुकको पुँजी बजार सधैं उकालो मात्रै नलाग्ने भएकाले बजार घट्नु पनि स्वाभाविक प्रक्रिया भएको उनले उल्लेख गरे।

अध्यक्ष भट्टले बोर्डको जिम्मेवारी बजारलाई बढाउने वा घटाउने नभई सबै लगानीकर्ताका लागि निष्पक्ष र प्रतिस्पर्धी वातावरण तयार गर्नु रहेको स्पष्ट पारे। बजारमा दुवै अवस्थाका लगानीकर्ताले समान अवसर पाउने व्यवस्था गर्न सर्ट सेलिङ प्रणाली ल्याउन लागिएको उनको भनाइ थियो।

सर्ट सेलिङ लागू भएपछि मूल्य घट्ने अनुमान गरेका लगानीकर्ताले सापटीमा सेयर लिएर बिक्री गर्न सक्नेछन्। त्यसपछि सेयरको मूल्य घटेपछि पुनः खरिद गरेर फिर्ता गर्दा बिक्री र खरिद मूल्यबीचको अन्तरबाट नाफा कमाउन सकिनेछ। त्यसैगरी, मूल्य बढ्ने अपेक्षा गर्ने लगानीकर्ताले हालको व्यवस्थाअनुसार सेयर खरिद गरी मूल्य बढेपछि बिक्री गरेर प्रतिफल लिन सक्नेछन्।

अध्यक्ष भट्टले यस्तो प्रणालीले बजारमा एकतर्फी मनोविज्ञान अन्त्य गर्न सहयोग पुग्ने विश्वास व्यक्त गरे। उनका अनुसार बजार घट्नेबित्तिकै नियामकमाथि दबाब सिर्जना हुने अवस्था पनि क्रमशः कम हुँदै जानेछ।

उनले बजारमा फैलिने अफवाह तथा भ्रामक सूचनाको प्रभाव नियन्त्रण गर्न बोर्डले थप नीतिगत व्यवस्था र नियामकीय संयन्त्रलाई पनि सुदृढ बनाउने जानकारी दिए। बोर्डले आगामी दिनमा अन्तर्राष्ट्रिय अभ्यासअनुसार आधुनिक वित्तीय उपकरण र कारोबार प्रणाली विस्तार गर्दै नेपाली पुँजी बजारलाई थप परिपक्व बनाउने लक्ष्य लिएको उनले बताए।