सिमरामा २ अर्ब लगानीमा पाँचतारे होटल ‘अन्नपूर्ण भिस्टा’ बनाउँदै क्याप्टेन रामेश्वर थापा

काठमाडौँ: सिमराको पर्यटन र व्यावसायलाई नयाँ उचाइ दिने लक्ष्यका साथ प्रतिष्ठित व्यवसायी क्याप्टेन रामेश्वर थापाले दुई अर्ब रुपैयाँको लगानीमा पाँचतारे होटेल अन्नपूर्ण भिस्टा रिट्रिट निर्माण सुरु गरेका छन्। थापाले एक अर्ब ९७ करोड रुपैयाँ लगानीमा अन्नपूर्ण भिस्टा रिट्रिट पाँचतारे होटेल निर्माण गरिरहेका छन्।

होटलको हालसम्म १३ प्रतिशत वित्तीय प्रगति भएको छ। कूल लगानीमा एक अर्ब ५४ करोड रुपैयाँ बैंकको ऋण रहेको छ। यसमध्ये ९८ करोड रुपैयाँ लगानी व्यवस्थापन भइसकेको अन्नपूर्ण भिस्टाले जनाएको छ। कुल लागतमध्ये ८० प्रतिशत बैंकको ऋण र २० प्रतिशत संस्थापकको स्वपुँजी हुने गरी लगानी संरचना बनाइएको छ।

होटल परियोजना निर्माणको प्रारम्भिक चरणमा छ। जग्गा प्राप्ति भइसकेको छ। खन्ने कार्य जारी छ। होटल परियोजना छ हजार वर्गमिटर क्षेत्रफलमा हुनेछ। होटल आगामी सन् २०२८ मा निर्माण सकेर सन् २०२९ देखि व्यापारिक सञ्चालनमा ल्याउने योजना रहेको छ।

निर्माणाधीन होटलमा ११७ कोठाहरु हुनेछन्। होटेलमा फुड एन्ड वेभरेज, स्वीमिङ पुल, कन्फरेन्स एन्ड ब्यांक्वेट हल, स्पा र क्यासिनोलगायत सम्पूर्ण पाँचतारे सुविधा हुने अन्नपूर्णले जनाएको छ । होटेल पूर्वाधार ६ हजार वर्गमिटरमा फैलनेछ।

होटेल सिमरा विमानस्थलबाट तीन किलोमिटर दूरीमा रहनेछ। नेपाल–भारत सीमा रक्सौलबाट २० किलोमिटर दूरीमा छ। निर्माणधीन होटेल विशेष गरी भारतीय पर्यटक लक्षित छ । त्यसले व्यापार र सीमापार वाणिज्यका निम्ति महत्वपूर्ण विन्दुका रूपमा काम गर्छ।

प्रकृति र वन्यजन्तुमा रुचि राख्ने आगन्तुकका निम्ति लोकप्रिय गन्तव्य पर्सा राष्ट्रिय निकुञ्जको नजिक भएका कारण बारामा पर्यटकको उच्च आवतजावत हुने गरेको छ।

अन्नपूर्ण भिस्टा गत वर्ष स्थापना गरिएको हो। कम्पनीको अध्यक्षमा थापा रहेका छन्। उनी सिम्रिक एयर, अन्नपूर्ण मिडिया नेटवर्क, अन्नपूर्ण रेडियो र एपी वान टेलिभिजनका अध्यक्ष हुन्।

यस्तै
नेपालको होटेल उद्योगमा तीव्र प्रतिस्पर्धा छ। ठूला लगानीमा प्रमुख सहर र पर्यटकीय गन्तव्यहरुमा धमाधम पाँचतारे होटेल खुल्ने क्रम बढेको छ। बैंकहरुले पनि होटल परियोजनामा खर्बौं रुपैयाँ लगानी गरिसकेका छन्।

होटल परियोजनाको निर्माण अवधि लामो हुन्छ। प्रिमियम होटेल निर्माण गर्न तीनदेखि चार वर्ष लाग्छ। सञ्चालन स्थिरीकरण गर्न थप दुईदेखि तीन वर्ष लाग्न सक्छ।

यसबाहेक प्रिमियम होटेलमा ठूलो लगानी आवश्यक पर्छ। ग्राहकलाई आकर्षित गर्न, अकुपेन्सीस्तर कायम राख्न, आफ्नो ब्रान्ड स्थापना गर्न र परिकल्पना गरिएअनुसार होटेलबाट लाभ उठाउन लामो समय लाग्ने गर्छ।