६५ मेगावाटको दूधखोला आयोजनालाई जुट्यो लगानी, एनएमबी बैंकको अगुवाईमा १० अर्ब ऋण

काठमाडौँः माउन्टेन इनर्जी लिमिटेडले सहायक कम्पनीमार्फत निर्माण गर्न लागेको ६५ मेगावाट क्षमताको दूधखोला जलविद्युत् आयोजनालाई लगानी जुटेको छ।

प्रवर्द्धक कम्पनी दूधखोला हाइड्रोपावर कम्पनी र बैंकहरूबीच वित्तीय व्यवस्थापनसम्बन्धी सम्झौतामा हस्ताक्षर भएको छ।

सम्झौताअनुसार आयोजनामा नेतृत्वदायी बैंक (लिड ) एनएमबी बैंकले गरेको छ। एनएमबीले ६ अर्ब ८१ करोड रुपैयाँ र सानिमा बैंकले ३ अर्ब २० करोड रुपैयाँ ऋण लगानी गर्ने भएका छन्। दुई बैंकले गरी आयोजनामा १० अर्ब १ करोड रुपैयाँ लगानी गर्नेछन्।

आयोजनाको लागत १२ अर्ब ८९ करोड

मनाङमा निर्माण हुने दूधखोला जलविद्युत् आयोजनाको कुल अनुमानित लागत १२ अर्ब ८९ करोड रुपैयाँ रहेको छ। आयोजनाको प्रतिमेगावाट लागत २० करोड रुपैयाँभन्दा कम पर्ने भएकाले यसलाई तुलनात्मक रूपमा आकर्षक आयोजना मानिएको छ।

आयोजनामा बैंकहरूले उपलब्ध गराउने ऋणबाहेक आवश्यक बाँकी रकम प्रवर्द्धक कम्पनीले लगानी गर्नेछ।

वित्तीय व्यवस्थापन सम्पन्न भएसँगै आयोजना निर्माणको काम तत्काल सुरु गर्ने तयारी कम्पनीले गरेको छ। निर्माण सुरु भएको तीन वर्षभित्र विद्युत् उत्पादन सुरु गर्ने लक्ष्य कम्पनीले राखेको छ।

माउन्टेन इनर्जीका दुई आयोजना सञ्चालनमा

माउन्टेन इनर्जीले निर्माण सम्पन्न गरेका ४२ मेगावाटको मिस्त्रीखोला जलविद्युत् आयोजना र ५ मेगावाटको ताँदीखोला जलविद्युत् आयोजना हाल नियमित रूपमा विद्युत् उत्पादन गरिरहेका छन्।

दूधखोला आयोजना निर्माण सम्पन्न भएपछि कम्पनीको विद्युत् उत्पादन क्षमता थप विस्तार हुनेछ।