‘सरकारको काम नियमन मात्र होइन सहजीकरण हो, उद्योगका कानुनी अवरोध हटाइनुपर्छ’

काठमाडौँ: राष्ट्रिय स्वतन्त्र पार्टीकी सांसद एवं उद्यमी विदुषी राणाले उद्योग स्थापना र सञ्चालनका क्रममा व्यवसायीले भोग्नुपर्ने नीतिगत जटिलता र कानुनी अवरोध हटाउन सरकारसँग माग गरेकी छन्।

काठमाडौँस्थित भृकुटीमण्डपमा नेपाल अटोमोबाइल्स इम्पोर्टर्स एण्ड म्यानुफ्याक्चरर्स एसोसिएसन (नाइमा)ले आयोजना गरेको अटो एक्सपोको अन्तिम दिन ‘शिक्षा, सीप र उद्यमशीलता’ सम्बन्धी संवादमा उनले यस्तो बताएकी हुन्। उनले सरकारको काम व्यवसायीलाई नियमन गर्ने मात्र नभई सहजीकरण र प्रोत्साहन गर्ने समेत भएको बताइन्। उद्योगको आवश्यकता र शिक्षाबीचको खाडल पुर्न तथा व्यवसाय दर्तादेखि स्वीकृतिसम्मका प्रशासनिक झन्झट अन्त्य गर्न आवश्यक रहेकोमा जोड दिइन्।

आर्थिक विकासका लागि अर्थतन्त्रलाई प्राथमिकतामा राख्नुपर्ने बताउँदै उनले भनिन्, ‘सरकारको काम व्यवसायीलाई नियमन गर्ने मात्र होइन, सहजीकरण र प्रोत्साहन गर्ने पनि हो।’ साथै, उनले समाजमा उद्यमी र उद्योगीप्रतिको दृष्टिकोणमा समेत परिवर्तन ल्याउन आवश्यक रहेको उल्लेख गरिन्। उद्यमशीलताको वातावरण सहज बनाएर मात्रै युवालाई नेपालमा रोक्न र देशको आर्थिक विकासलाई गति दिन सकिने उनको निष्कर्ष थियो।

सांसद राणाले नेपालको शिक्षा प्रणाली र उद्योगको आवश्यकताबीच ठूलो अन्तर रहेको टिप्पणी गरिन्। हालको पाठ्यक्रमले उद्योगलाई आवश्यक जनशक्ति उत्पादन गर्न नसकेको उनको तर्क थियो। ‘अटोमोबाइल क्षेत्रलाई ई-भेहिकल इन्जिनियर चाहिएको छ, म्यानुफ्याक्चरिङलाई मेसिन अपरेटर र गार्मेन्टलाई डिजाइनर चाहिएको छ। तर, हाम्रो पाठ्यक्रम उद्योगको आवश्यकता अनुसार छैन,’ उनले भनिन्।

विद्यार्थीलाई कक्षाकोठामा मात्र सीमित नराखी उद्योग, कारखाना र वर्कसपमै पुगेर सिक्ने वातावरण बनाउनुपर्ने उनले सुझाव दिइन्।