नेपालले नेदरल्यान्ड्सलाई दियो १६८ रनको लक्ष्य

काठमाडौँ– आईसीसी विश्वकपको ग्लोबल छनोटमा अहिले नेपालले नेदरल्यान्ड्सको सामना गरिरहेको छ। खेलको पहिलो पारी सकिएसँगै सुरुआतमा ब्याटिङ गरेको नेपालले १६८ रनको लक्ष्य प्रस्तुत गरेको छ। नेपालले ४४ ‌ओभर तीन बलमा सबै विकेट गुमाएर १६७ रन बनाएपछि सो लक्ष्य दिएको हो।

दुवै टिमलाई अनिवार्य जितको आवश्यकता छ। छनोटको सुपर सिक्समा पुग्ने हो भने नेपाल र नेदरल्यान्ड्सलाई अनिवार्य जितको आवश्यकता छ। खेलमा राम्रो प्रदर्शन गर्न खोजे पनि नेपालले लगातार विकेट गुमाइरह्यो।

नेपाका लागि कप्तान रोहित कुमार पौडेलले सर्वाधिक ३३ रन बनाए। ३३ रन बनाउनका लागि पनि उनले ५५ रन खर्च गर्नुपर्‍यो। सुरुआतबाटै किफायती देखिएका नेदरल्यान्ड्का बलर उत्तिकै घातक सावित भए।

नेपालले खेलको तेस्रो ओभरमै दोस्रो विकेट गुमाएयो। ओपनर आसिफ शेख पहिलो विकेटका रुपमा आउट भएको १२ ओभरपछि नेपालले दोस्रो विकेटका रुपमा कुशल भुर्तेललाई गुमाएको थियो।

ओपनर कुशलले ४२ बलमा २७ रन मात्र बनाउन सके। विक्रमजित सिंहले एडवार्डको हातबाट क्याचआउट गराएपछि नेपालको खातामा ४६ रन मात्र थियो। उनी १४ ओभर पाँच बलमा आउट भएका हुन्।

त्यसअघि खेलमा दुई बल मात्र सामना गर्न पाएका आसिफ आउट भएका थिए। आसिफ आउट हुँदा नेपालको खातामा सात रन थियो। उनलाई भान बिकले तेस्रो ओभरको दोस्रो बलमा पवेलियन फर्काएका थिए।

छनोटको समूह चरणको अन्तिम खेलमा नेपालले अनिवार्य जितको आवश्यकता भए पनि नेपाललाई सहज भने देखिएको छैन। किनभने त्यसपछिका ब्याटरहरु पनि धमाधम डगआउट फर्किने थाले।

भीम सार्कीले त खेलमा सबैभन्दा धेरै डट बलको सामना गरे। मैदानमा टिक्ने स्वभाव देखाए पनि उनी ५६ बल खेलेर २२ रन बनाउँदै मैदान छोडे।उनलाई फ्योडको बलमा शरिज अहमजले क्याचआउट गराएका थिए।

भीम आउट हुनुपूर्व नै ६ रन बनाएका आरिफ शेखले पवेलियनको बाटो देखिसकेका थिए। आरिफलाई आउट गर्ने विक्रमजित नै थिए। त्यो उनको दोस्रो विकेट रह्यो।

आरिफ आउट हुँदा ५४ रन बनाएको नेपालले ६६ रन बनाउँदा चार विकेट गुमायो। त्यसपछि कुशल मल्ल र कप्तान रोहित पौडेलको जोडीलाई केही समय टिक्ने आशा गरिएको थियो। तर उनीहरुको साझेदारी पनि जम्न सकेन।

९१ रनबनाउँदै कुशल मल्ल डिपार्ट भए। १२ रन बनाएका ब्याटर मल्ल पाँचौ विकेटका रुपमा आउट भएका हुन्। उनलाई आर्यन दत्तले पवेलियन फर्काएका हुन्। रोहित र दिपेन्द्रको साझेदारी पनि जम्न सकेन। रोहित पौडेल ३३ रन बनाएर आउट भइहाले भने दिपेन्द्रले पनि १४ रन मात्र बनाउन सके।

रोहित र दिपेन्द्रलाई भान विकले आउट गराएका थिए। सन्दीपमसँग ३२ रनको साझेदारी गरेर गुल्सन झा पनि पवेलियन फर्किएका थिए। गुल्सनले १५ रन बनाए भने करण केसी त एक रनमै आउट भए। अन्तिममा सन्दीपले २७ रन बनाएका थिए।

नेपालविरुद्ध नेदरल्यान्ड्सका लोगन भान विकले ४ विकेट लिए भने बास डि लिड र विक्रमाजितले समान दुईदुई विकेट लिए। त्यस्तै, क्लाटन फ्योड र आर्यन दत्तले पनि समान एकएक विकेट गिराएका थिए।

नेपालको प्लेइङ–११
रोहित पौडेल (कप्तान), आसिफ शेख (विकेटकिपर), कुशल भुर्तेल, भीम सार्की, आरिफ शेख, दीपेन्द्रसिंह ऐरी, कुशल मल्ल, गुल्सन झा, करण केसी, सन्दीप लामिछाने र ललितनारायण राजवंशी