ट्रम्पले भने– ‘नेपालले जे माग्छ, हामी त्यो दिन तयार छौँ’, तत्काल ५ लाख डलर आपतकालिन सहयोग

अमेरिकी राष्ट्रपति डोनाल्ड ट्रम्पले नेपालमा हालै आएको विनासकारी बाढी र पहिरोप्रति गहिरो दुःख व्यक्त गर्दै राहत र उद्धारमा सहयोग गर्ने घोषणा गरेका छन्। बिहीबार ओभल अफिसमा पत्रकारहरूसँग कुरा गर्दै ट्रम्पले नेपाललाई आवश्यक पर्ने जुनसुकै सहयोग उपलब्ध गराउन आफूहरू तयार रहेको बताए।

नेपालमा बाढीले पुर्‍याएको क्षतिको वर्णन गर्दै राष्ट्रपति ट्रम्पले भने, ‘नेपालको स्थिति निकै भयावह छ। त्यहाँ केवल पानी मात्र नभएर माटो र ढुङ्गासहितको यस्तो शक्तिशाली बहाव आयो जसले बलिया भवनहरूलाई पनि सलाईको काँटी झैं बगायो। हामीले नेपाल सरकारसँग कुरा गरेका छौँ र उनीहरूलाई जे चाहिन्छ, त्यो दिन हामी तयार छौँ।’

राष्ट्रपति ट्रम्पले नेपालमा रहेका दर्जनौँ अमेरिकी नागरिकहरू अझै सम्पर्कविहीन रहेकोमा चिन्ता व्यक्त गरे। अमेरिकी विदेश मन्त्रालयले करिब ९० जना अमेरिकी नागरिकहरू बाढी प्रभावित क्षेत्रमा हुनसक्ने बताएको छ। ट्रम्पले भने, ‘हामी उहाँहरूको अवस्था बुझ्दैछौँ। केही मानिसहरूले ज्यान गुमाएको हुनसक्ने देखिएको छ, जुन निकै दुःखद छ।’

यसैबीच, अमेरिकी विदेश मन्त्रालयले नेपालको रसुवा जिल्ला र आसपासका बाढी प्रभावितका लागि ५ लाख डलर (करिब ६ करोड ७० लाख रुपैयाँ भन्दा बढी) को आपत्कालीन मानवीय सहायता घोषणा गरेको छ। यो रकम ‘क्याथोलिक रिलिफ सर्भिसेज’ मार्फत पीडितहरूका लागि अस्थायी आवास, राहत सामग्री, खानेपानी र सरसफाइका क्षेत्रमा खर्च गरिनेछ।

अमेरिकी विदेश मन्त्री मार्को रुबियोले पनि भोटेकोशी र त्रिशूली नदीमा आएको बाढीले पुर्‍याएको क्षतिप्रति दुःख व्यक्त गरेका छन्। बाढीका कारण हालसम्म कम्तीमा १४७ जनाको मृत्यु भइसकेको छ। रुबियोले नेपाल सरकारलाई आवश्यक सबै प्रकारका सहयोग गर्न अमेरिका तयार रहेको बताए।

काठमाडौँस्थित अमेरिकी दूतावासले रसुवा, नुवाकोट, धादिङ, गोरखा, चितवन र तनहुँ लगायतका प्रभावित जिल्लाहरूमा रहेका आफ्ना नागरिकहरूको खोजी कार्य जारी राखेको छ। दूतावासले सहयोग आवश्यक पर्ने अमेरिकी नागरिकहरूलाई KathmanduACS@state.gov मा इमेल गर्न वा दूतावासको हटलाइन नम्बरमा सम्पर्क गर्न अनुरोध गरेको छ।