लियोनेल मेस्सीले गरे अन्तर्राष्ट्रिय फुटबलबाट सन्यासको घोषणा

काठमाडौं। विश्वका महान् फुटबल खेलाडी लियोनेल मेस्सीले अन्तर्राष्ट्रिय फुटबलबाट सन्यासको घोषणा गरेका छन्। अर्जेन्टिनालाई फिफा विश्वकप र दुई कोपा अमेरिका उपाधि दिलाएका ३९ वर्षीय मेसीले आफ्नो राष्ट्रिय टोलीसँगको यात्रा समाप्त भएको बताएका हुन्।

मेस्सीले अर्जेन्टिनाको राष्ट्रिय टोलीबाट बिदा हुने घोषणा सोमबार सामाजिक सञ्जाल इन्स्टाग्राम मार्फत सार्वजनिक गरेका हुन्। उनको यो निर्णयसँगै अर्जेन्टिनाको राष्ट्रिय टोलीमा मेस्सी युगको औपचारिक अन्त्य भएको छ।

दुई दशक लामो अन्तर्राष्ट्रिय खेल जीवनमा मेस्सी अर्जेन्टिनाका सर्वाधिक खेल खेल्ने र सर्वाधिक गोल गर्ने खेलाडी बनेका छन्। उनले राष्ट्रिय टोलीबाट २१० खेलमा १२५ गोल गर्दै अर्जेन्टिनालाई सन् २०२२ को फिफा विश्वकप, २०२१ र २०२४ को कोपा अमेरिका तथा फिनालिसिमा उपाधि दिलाएका थिए। २०२६ को विश्वकपमा भने अर्जेन्टिना स्पेनसँग फाइनलमा पराजित भएको थियो।

आठ पटकका बालोन डी’ओर विजेता मेस्सीले अर्जेन्टिनाबाट आफ्नो अन्तिम अन्तर्राष्ट्रिय खेल खेलेसँगै विश्व फुटबलको एउटा ऐतिहासिक अध्याय समाप्त भएको छ। उनी हाल अमेरिकन क्लब इन्टर मियामीबाट क्लब फुटबल खेलिरहेका छन्।

उनको सन्याससँगै अर्जेन्टिनाले आफ्नो स्वर्णिम पुस्ताका अन्तिम महान् कप्तानलाई बिदाइ गरेको छ। सन् २०१६ मा कोपा अमेरिका कपमा चिलीसँग पराजित भएपछि विश्व खेलबाट सन्यास घोषणा गरेका थिए। व्यापक दबाबपछि उनले सन्यास फिर्ता लिएका थिए।

इन्स्टाग्राममा लामो सन्देश लेख्दै मेसीले यो निर्णय आफ्नो आत्माका लागि सबैभन्दा पीडादायी भए पनि यही सही समय भएको उल्लेख गरेका छन्।

‘फाइनलपछि धेरै समय सोचें, अब राष्ट्रिय टोलीबाट सन्यास लिने निर्णय गरेको छु। यो निर्णयले मेरो मन दुखाएको छ र अझै पनि दुखाइरहेको छ, तर म बुझ्छु—यही समय हो’ उनले लेखेका छन्।

मेसीले आफूले अर्जेन्टिनाको जर्सीका लागि सधैं आफ्नो सम्पूर्ण शक्ति दिएको र समर्थकलाई गर्व गराउने प्रयास कहिल्यै नछोडेको बताएका छन्।

‘मैले सधैं सबैथोक दिएँ। पछिल्ला सफल वर्षहरूमा मात्र होइन, सुरुदेखि नै यो जर्सीका लागि लडें। अब मसँग दिन बाँकी केही छैन। नयाँ पुस्ताका उत्कृष्ट खेलाडीहरू आउँदैछन्, उनीहरू नै यो स्थानका हकदार हुन्’ उनले भनेका छन्।

दुई दशक लामो अन्तर्राष्ट्रिय यात्रालाई सम्झँदै उनले राष्ट्रिय टोलीप्रतिको आफ्नो प्रेम कहिल्यै समाप्त नहुने बताएका छन्।

‘म राष्ट्रिय टोलीलाई माया गर्थें, गर्छु र सधैं गर्नेछु। अब म मैदानभित्र होइन, बाहिरबाट तपाईंहरूसँगै अर्जेन्टिनालाई समर्थन गर्नेछु।’

उनले आफ्नो परिवार, प्रशिक्षक, टोलीका सहकर्मी र सम्पूर्ण समर्थकप्रति आभार व्यक्त गर्दै विश्वकप जितेको क्षणलाई जीवनकै सबैभन्दा अविस्मरणीय सम्झना बताएका छन्।

सन्देशको अन्त्यमा मेसीले लेखेका छन्— ‘भगवान, मलाई अर्जेन्टिनी बनाइदिनुभएकोमा धन्यवाद। अर्जेन्टिना, सधैं अगाडि बढोस।’

३९ वर्षीय मेस्सीले लेखेका छन्, “यो यस्तो निर्णय थियो, जसले मलाई निकै दुखायो र अझै पनि भित्रसम्म दुखिरहेको छ। तर अब समय आएको छ भन्ने मैले बुझेको छु।”