बाढी प्रभावित सबै क्षेत्रमा नेपाल टेलिकमको नेटवर्क पहुँच पुनःस्थापित

काठमाडौँ: नेपाल टेलिकमले बाढी प्रभावित रसुवा, नुवाकोट र धादिङलगायतका जिल्लाका सबै प्रभावित सबै क्षेत्रमा सञ्चार सेवाको पहुँच पुनःस्थापित गरेको जनाएको छ।

भदौ १० गते आएको बाढीका कारण ती जिल्लामा नेपाल टेलिकमका टावरबाट सञ्चालित मोबाइल तथा इन्टरनेट सेवा अवरुद्ध भएको थियो। कम्पनीका प्राविधिकहरू विपद् प्रतिकार्य कक्ष तथा प्रभावित क्षेत्रमा निरन्तर खटिएर सेवा पुनःसञ्चालनमा ल्याइएको कम्पनीले जनाएको छ।

सडक तथा विद्युत् सेवा अवरुद्ध भएका स्थानमा सुरक्षा निकायसँगको समन्वयमा हेलिकप्टरमार्फत प्राविधिक, उपकरण, जेनेरेटर तथा इन्धन पुर्‍याएर सेवा सञ्चालन गरिएको कम्पनीले जनाएको छ।

बाढीका कारण रसुवा, नुवाकोट र धादिङका १२० साइटमध्ये ८३ साइटबाट सञ्चालित सेवा अवरुद्ध भएका थिए। तीमध्ये टिमुरे, चिलिमे खोला र त्रिशूली–३ ‘बी’ साइट पूर्ण रूपमा क्षतिग्रस्त भएका छन्। पूर्ण रूपमा क्षतिग्रस्त साइटबाट उपलब्ध हुने सेवा भने हाल अन्य साइटमार्फत प्रदान भइरहेको कम्पनीले जनाएको छ।

कम्पनीका अनुसार भदौ ११ गते रसुवाको न्यौपानेचौर र राम्चे रिपिटर साइटमा हेलिकप्टरमार्फत जेनेरेटर, इन्धन तथा ब्याट्रीलगायतका उपकरण पुर्‍याएर सेवा सञ्चालन गरिएको थियो। रसुवा सदरमुकाम धुन्चेमा पनि जेनेरेटर, इन्धन तथा कर्मचारी परिचालन गरिएको थियो।

भदौ १२ गते रसुवाको गोलजुङ टावर, नुवाकोटको गेर्खु, तुप्चे तथा टिमुरेमाथिको डाँडामा रहेका टावरमा हेलिकप्टरमार्फत जेनेरेटर, इन्धन र प्राविधिक पठाएर सेवा सञ्चालन गरिएको कम्पनीले जनाएको छ। नुवाकोटको मदनपुर, बट्टार, विदुर बसपार्क तथा धादिङको बैरेनी ठमेल डाँडामा समेत जेनेरेटर, इन्धन र कर्मचारी परिचालन गरी सेवा सुचारु गरिएको थियो।

भदौ १३ गते रसुवाको त्रिशूली–३ ‘ए’ नजिक रहेको टावर, उत्तरगया गाउँपालिकाको कालिकास्थान तथा नुवाकोटको बुङताङका टावर सञ्चालनमा ल्याइएका थिए। कटुन्जे, सामरी भञ्ज्याङ र बेतिनीका टावरसमेत सञ्चालनमा आएपछि प्रभावित १२० साइटमध्ये ९३ साइट सञ्चालनमा आएका थिए।

भदौ १४ गते रसुवाको नेपाल–चीन सीमास्थित रसुवा बोर्डर साइटसहित अपर सेन्जेन, छापथोके, जिबजिबे माइक्रो र गत्लाङ तथा नुवाकोटको चारघरे र चारघरे मुलाबारी साइट सञ्चालनमा ल्याइएको थियो। रसुवा बोर्डर बीटीएस साइट सञ्चालनमा आएपछि नेपाल–चीन नाका, टिमुरे, रसुवा बोर्डर करिडोर तथा स्याफ्रुबेसीदेखि भोटेकोशी करिडोरसम्म मोबाइल सेवा पुनः सञ्चालनमा आएको थियो।

त्यसैगरी भदौ १५ गते रसुवाको जिबजिबे र सरमथली, धादिङको बेनीघाट तथा नुवाकोटको त्रिशूली बजार साइटसमेत सञ्चालनमा ल्याइएको कम्पनीले जनाएको छ।

अन्ततः भदौ १६ गते धादिङको कल्लेरी तथा नुवाकोटका भद्रटार–थाप्रेक, पुसनटार, तारुका, किस्पाङ (भाल्चे) र बुधसिंह साइट सञ्चालनमा ल्याइएपछि नेपाल टेलिकमका सबै साइट सञ्चालनमा आएका हुन्।

कम्पनीका अनुसार विद्युत् आपूर्ति नियमित नभएका कतिपय साइट हाल पनि जेनेरेटरमार्फत सञ्चालनमा छन्। विद्युत् आपूर्ति सहज भएका कतिपय साइट स्वतः सञ्चालनमा आएका छन् भने फोरजी सेवाको प्रभावकारितासमेत क्रमशः बढ्दै गएको छ।

पूर्ण रूपमा क्षतिग्रस्त टिमुरे, चिलिमे खोला र त्रिशूली–३ ‘बी’ साइटलाई प्राथमिकतामा राखी पुनर्निर्माण गरेर पुनः सञ्चालनमा ल्याइने कम्पनीले जनाएको छ।