भोटेकोशी बाढी प्रभावितहरुलाई दीपशिखा धितोपत्रको १५ लाख सहयोग

काठमाडौं। दीपशिखा धितोपत्र कारोबार कम्पनीले रसुवाको भोटेकोशीमा आएको विनाशकारी बाढीबाट प्रभावितहरूको उद्धार, राहत तथा पुनर्स्थापनाका लागि १५ लाख रुपैयाँ आर्थिक सहयोग गरेको छ।

कम्पनीले उक्त रकम प्रधानमन्त्री दैवी प्रकोप उद्धार कोषमा जम्मा हुने गरी सहयोग गरेको कम्पनीका सञ्चालक विष्णु ओझाले जानकारी दिए।

बाढी प्रभावितहरूको खोजतलास, उद्धार तथा राहत कार्यमा सहयोग पुगोस् भन्ने उद्देश्यले संस्थागत सामाजिक उत्तरदायित्वअन्तर्गत आर्थिक सहयोग गरिएको ओझाले बताए।

गत १० भदौमा रसुवाको भोटेकोशीमा आएको विनाशकारी बाढीले ठूलो जनधनको क्षति पुर्‍याएपछि प्रभावितहरूको खोजतलास, उद्धार तथा राहतका लागि नेपालको व्यावसायिक क्षेत्रबाटसमेत उल्लेख्य सहयोग भइरहेको छ।

देश तथा विदेशमा रहेका नेपाली नागरिक र नेपालको व्यावसायिक क्षेत्रबाट प्राप्त सहयोगले विपद्का समयमा प्रभावित परिवारलाई राहत पुर्‍याउनुका साथै सरकारमाथिको आर्थिक भार कम गर्नसमेत महत्वपूर्ण योगदान पुर्‍याएको छ।