विपत्तिपछि पनि चीनको ग्यिरोङमै व्यवसाय पुनःसञ्चालनको तयारी गर्दै १३ सय नेपाली

काठमाडौं। चीनको स्वायत्त क्षेत्र सिजाङ (तिब्बत) अन्तर्गतको विपद्ग्रस्त ग्यिरोङ सहरमा रहेका एक हजार तीन सयभन्दा बढी नेपालीले बाढीपहिरोको ठूलो क्षतिपछि पनि त्यहीँ बसेर आफ्नो व्यवसाय पुनः सञ्चालन गर्ने निर्णय गरेका छन्।

गत भदौ १० गते नेपालतर्फको उच्च हिमाली क्षेत्रमा हिमनदी भत्किएपछि आएको महाप्रलयले नेपाल–चीन सीमास्थित ग्यिरोङ नाकामा ठूलो क्षति पुर्याएको थियो। यो क्षेत्र नेपालको रसुवागढी नाकासँग जोडिएको चीन तर्फको व्यापारीक नाका हो।

उक्त विपत्तिमा ग्यिरोङ काउन्टीमा कम्तीमा ४३ जनाको मृत्यु भएको छ भने ५१९ जना अझै बेपत्ता रहेको चिनियाँ अधिकारीहरूले बताएका छन्। खोज तथा उद्धार कार्य अझै जारी छ।

विपत्तिपछि पनि त्यहाँ रहेका अधिकांश नेपाली व्यवसायीहरूले ग्यिरोङलाई आफ्नो रोजगारी, सपना र भविष्यसँग जोडिएको स्थानका रूपमा हेरेर फर्किनुभन्दा त्यहीँ बसेर पुनः व्यवसाय सञ्चालन गर्ने तयारी गरेका छन्।

उक्त क्षेत्रमा गिफ्ट पसल र रेस्टुरेन्ट व्यवसाय सञ्चालन गर्दै आएका सागा छिरिङ तामाङले विपत्तिको खबर सुनेलगत्तै नेपालमा रहेका परिवारसँग सम्पर्क गर्न खोजेको अनुभव सुनाए। उनले चीन सरकारले खाद्यान्न, स्वास्थ्य सेवा र आवश्यक व्यवस्थापन उपलब्ध गराएको बताए।

‘मैले घरमा चिन्ता नगर्नुस् भनें। यहाँ खाना, औषधि र सबै व्यवस्था राम्रो छ। आप्रवासन प्रहरी र अन्य अधिकारीहरूले पनि कुनै समस्या परे सिधै भन्नुस्, नेपाल फर्किन चाहनुहुन्छ भने पनि व्यवस्था गरिदिन्छौँ भनेर सहयोग गरेका थिए,‘ उनले भने।

चाँदीका भाँडाकुँडा व्यवसाय सञ्चालन गर्दै आएका राजेन्द्र घतानीले ग्यिरोङ क्षेत्र आफ्ना लागि केवल काम गर्ने ठाउँ नभई आफ्नो आधार बनेको बताए। ‘मलाई यो सहरमा निकै सहज लाग्छ। यहाँ सुरक्षित महसुस हुन्छ,‘ उनले भने। उनका अनुसार ग्यिरोङमा रहेका धेरै नेपाली व्यवसायीहरूले यहीँबाट भविष्यमा चीनका अन्य ठूला सहरसम्म आफ्नो व्यापार विस्तार गर्ने सपना देखिरहेका छन्।

रसुवाका नेपालीलाई कर छुट

तामाङका अनुसार ग्यिरोङ रसुवासँग जोडिएकाले नेपाली व्यवसायीलाई त्यहाँ व्यापार गर्न सहज वातावरण छ। ‘रसुवाका नेपालीलाई कर छुटको सुविधा छ। कम लगानीमा व्यवसाय गर्न सकिन्छ र दुई घण्टामै आफ्नो गाउँ पुग्न सकिन्छ। यही हाम्रो लागि सबैभन्दा ठूलो अवसर हो,‘उनले भने।

शताब्दीयौंदेखि ग्यिरोङ नाका चीन र नेपालबीच व्यापार र जनस्तरको सम्बन्धको महत्वपूर्ण केन्द्र रहँदै आएको छ। महाप्रलयले त्यहाँका नेपाली व्यवसायीको व्यापारमा ठूलो धक्का पुर्याए पनि उनीहरूले ग्यिरोङलाई अझै पनि आफ्नो सपनाको भूमि मान्दै त्यहीँ बसेर नयाँ सुरुआत गर्ने अडान कायम राखेका छन्। सीसीटीभी प्लस