बढ्यो नेप्से, कुमारी बैंकको कारोबार उच्च

काठमाडौँः साताको अन्तिम कारोबार दिन शुक्रबार नेपाल स्टक एक्सचेन्ज (नेप्से) परिसूचक बढेर बन्द भएको छ। अघिल्लो दिन सामान्य करेक्सनपछि बढेर बन्द भएको बजारले शुक्रबार पनि वृद्धिको क्रमलाई निरन्तरता दिएको हो।

शुक्रबार नेप्से परिसूचक २२.८५ अंकले बढेर २६४७.२२ विन्दुमा पुगेको छ।

नेप्सेसँगै शुक्रबार कारोबार रकममा पनि वृद्धि भएको छ। अघिल्लो कारोबार दिन बिहीबार ५ अर्ब ४९ करोड रुपैयाँ बराबरको सेयर कारोबार भएकोमा शुक्रबार कारोबार रकम बढेर ६ अर्ब ७४ करोड ५६ लाख रुपैयाँ पुगेको छ।

यस दिन ३४५ वटा स्टकको २ करोड १२ लाख ७२ हजार कित्ता सेयर खरिदबिक्री भएको छ।  आज स्नो रिभर्स लिमिटेडको शेयरमूल्य सर्वाधिक बढेको छ। कम्पनीको सेयरमूल्य १३.६६ प्रतिशतले बढेको हो।

त्यस्तै, इन्फिनिटी लघुवित्त वित्तीय संस्थाको शेयरमूल्य करिब १० प्रतिशतले बढेको छ। यता, हाथवे इन्भेष्टमेन्टको सेयरमूल्य भने शुक्रबार सर्वाधिक घटेको छ। कम्पनीको सेयरमूल्य १५ प्रतिशतले घटेको छ।

कारोबार रकमका आधारमा शुक्रबार कुमारी बैंक शीर्ष स्थानमा रहेको छ। बैंकको ३२ करोड १३ लाख रुपैयाँ बराबरको शेयर कारोबार भएको छ। समग्रमा साताको अन्तिम कारोबार दिन बजार परिसूचकसँगै कारोबार रकमसमेत बढेको छ।