नेप्सेमा प्राविधिक समस्या, वेबसाइटमा विवरण देखिएन, कारोबार ठप्प

काठमाडौँ: नेपाल स्टक एक्सचेन्ज (नेप्से) को कारोबार प्रणालीमा प्राविधिक समस्या देखिएपछि साताको पहिलो दिनको सेयर कारोबार प्रभावित भएको छ।

नेप्सेको वेबसाइटमा समेत समस्या देखिएको छ। यतिबेला बजारको कारोबार विवरण प्रदर्शन भएको छैन भने कारोबार प्रणाली पनि सञ्चालनमा आउन सकेको छैन। । वेबसाइट खोल्दा ‘503 Service Unavailable – No server is available to handle this request’ भन्ने सूचना देखिएको छ।

नेप्सेका प्रमुख कार्यकारी अधिकृत (सीईओ) चुणामणि चापागाईंका अनुसार डाटा हबमा आइतबारदेखि र्‍यान्समवेयर आक्रमण भएपछि टीएमएस सञ्चालनमा समस्या आएको हो। त्यसको प्रभाव अधिकांश ब्रोकरको कारोबार प्रणालीमा परेको छ।

हाल ७२ वटा ब्रोकरले प्रयोग गर्ने टीएमएस सञ्चालनमा ल्याउन नसकिने अवस्था रहेको बताइएको छ। आफ्नै टीएमएस भएका १२ वटा ब्रोकर भने कारोबार सञ्चालन गर्न सक्ने अवस्थामा रहेको जनाइएको छ।

प्राविधिक समस्या तत्काल समाधान नभए आजको बजार कारोबार नै स्थगित गर्नुपर्ने अवस्था आउन सक्ने नेप्सेले जनाएको छ। समस्या समाधानका लागि आवश्यक प्राविधिक काम भइरहेको छ।

डाटा हबमा नेप्सेको कारोबारसम्बन्धी विवरणबाहेक अन्य १७–१८ वटा सरकारी निकायका अभिलेखसमेत रहेको बताइएको छ।

समस्या समाधानका लागि प्रयास भैरहेको नेप्सेले जनाएको छ।