विदेशमा रहेका नेपाली पनि सामाजिक सुरक्षा कोषमा जोडिन पाउने

काठमाडौँ- सामाजिक सुरक्षा कोषले वैदेशिक रोजगारीमा गएका नेपाली श्रमिकलाई लक्षित गरी सामाजिक सुरक्षा कोषमा आबद्ध गराउने योजना सुरु गरेको छ। बुधबार कोषले आयोजना गरेको कार्यक्रममा प्रधानमन्त्री पुष्पकमल दाहाल प्रचण्डले उक्त योजनाको आरम्भ गरेका हुन्।

कोषले योजनाको सरुवात गर्दै वैदेशिक रोजगारीमा रहेका श्रमिकलाई समेत कोषमा आबद्ध गराएर योगदानमा आधारित सामाजिक सुरक्षाको दायरा विस्तार गर्न लागेको हो। श्रम स्वीकृति लिने बेला, श्रम स्वीकृति नवीकरण गर्ने बेला र नवीकरण गर्ने बेला नभएकाहरू पनि वैदेशिक रोजगार विभाग र सामाजिक सुरक्षा कोषको वेबसाइटमार्फत यस योजनामा सहभागी हुन पाउने कोषले जनाएको छ।

योजनामा सहभागी हुन चाहने वैदेशिक रोजगारमा रहेका नेपालीले हरेक महिना २ हजार २ रुपैयाँ बुझाउनुपर्छ। योगदान बापतको रकम एकमुष्ट बुझाउन पनि सकिने छ। सात महिनाभन्दा बढीको रकम जम्मा गरेमा १० प्रतिशत छुट पाइने व्यवस्था कोषले गरेको छ। योगदान बापतको रकम खल्ती, ईसेवा र कनेक्ट आइपीएसमार्फत् नै रकम जम्मा गर्ने व्यवस्था मिलाइएको कोषले बताएको छ।

कोषमा हालसम्म औपचारिक क्षेत्रका ३ लाख ९९ हजार ५६६ श्रमिक आबद्ध रहेकोमा ३० अर्ब ८७ करोड योगदान रकम संकलन भएको छ। कोषले योगदानकर्तालाई तीन अर्ब ८१ करोड रुपैयाँ दाबी भुक्तानी दिएको छ।

औपचारिक तथा अनौपचारिक क्षेत्रमा रहेका श्रमिकलाई योगदानमा आधारित समाजिक सुरक्षा योजनाभित्र समेट्ने उद्देश्यले २०७५ मंसिर ११ गतेदेखि योगदानमा आधारित सामाजिक सुरक्षा योजना कार्यान्वयनमा आएको थियो। यो योजना सुरू भएसँगै वैदेशिक रोजगारीमा रहेका लाखौँ नेपाली श्रमिक लाभ लिन सक्ने कोषले जनाएको छ।

वैदेशिक रोजगारीमा रहेका वा जान चाहने नेपालीलाई न्यूनतम २ हजारदेखि अधिकतम २८ हजार १ सय ५५ रुपैयाँसम्म कोषमा योगदान गर्न सक्नेछन्।

योजना अन्तर्गत योगदान गर्नेलाई १ लाख रुपैयाँसम्मको वार्षिक दुर्घटना उपचार खर्च, ५ हजार ६ सय ३१ रुपैयाँसम्म अशक्तता पेन्सन, आश्रित परिवारलाई ३ हजार ७ सय ५४ रुपैयाँसम्म आजीवन पेन्सन, २१ वर्षसम्म सन्ततिलाई ३ हजार ७ सय ५४ रुपैयाँसम्मको शैक्षिक वृत्तिबापत रकमलगायतका सुविधा उपलब्ध गराइने कोषले जनाएको छ।