काठमाडौंमा एक वर्षमै दर्ता भए ७ हजार १०१ बैंकिङ कसुरका मुद्दा

काठमाडौं– जिल्ला प्रहरी परिसर काठमाडौंले संघीय राजधानीसमेत रहेको काठमाडौंमा एक वर्षमा बैंकिङ कसुरमा ७ हजार १०१ एक मुद्दा दर्ता भएको तथ्यांक सार्वजनिक गरेको छ। जिल्ला प्रहरी परिसर काठमाडौं पत्रकार सम्मेलन गरी आर्थिक वर्ष २०७९/८० को एक वर्षमा काठमाडौंभित्र बैंकिङ कसुरसम्बन्धी ७ हजार १०१ मुद्दा दर्ता भएको जानकारी दिएको हो।

पत्रकार सम्मेलनमा परिसरका प्रमुख प्रहरी वरिष्ठ उपरीक्षक दानबहादुर कार्कीले आव २०७८/७९ को तुलनामा आव २०७९/८० मा बैंकिङ कसुरको मुद्दा दोब्बरले बढेको जानकारी दिए। ‘आव २०७८/७९ मा ३ हजार ७१५ मुद्दा दर्ता भएका थिए। आव २०७९/८० मा ७ हजार १०१ मुद्दा दर्ता भएका छन्, अघिल्लो आवको तुलनामा पछिल्लो आवमा दर्ता भएका मुद्दाको संख्या झन्डै दोब्बर हो’, उनले भने।

यस्तै, आव २०७८/७९ को तुलनामा आव २०७९/८० मा चोरीका घटनामा समेत वृद्धि भएका छन्। आव २०७८/७९ मा ४६० चोरीका घटना दर्ता भएका थिए भने आव २०७९/८० मा ६४७ चोरीका घटना दर्ता भएको परिसरले जनाएको छ। यसैगरी आव २०७९/८० मा लागूऔषधमा ३६८ मुद्दा दर्ता भएका छन्। सोही आवमा काठमाडौँभित्र ३४१ जनाले आत्महत्या गरेको तथ्यांक छ।

ज्यानसम्बन्धी कसुर आव २०७८/७९ को तुलनामा आव २०७९/८० मा घटेको छ। आव २०७८/७९ मा ३७ जनाको हत्या भएको थियो भने आव २०७९/८० मा २७ जनाको हत्या भएको परिसर प्रमुख कार्कीले बताए।
काठमाडौँमा अपराध अनुसन्धानमा महत्त्वपूर्ण साधन मानिने सिसीटिभी बिग्रिएकाले सोचेजस्तो काम हुन नसकेको उनको भनाइ छ।

जिल्ला प्रहरी परिसर काठमाडौं मातहतमा १ हजार ७७ सिसीटिभी जडान भए पनि हाल जम्मा ५३२ सिसिटिभी मात्र चालू अवस्थामा छन्। सिसिटिभी जडानका लागि हालै मात्र काठमाडौं महानगर र बूढानीलकण्ठ नगरपालिकाले प्रहरीसँग सम्झौता गरेर काम अगाडि बढाइसकेको छ।