गाडी गुड्ने सडक हिलाम्य, चीनबाट आयातीत बिजुली कार टिमुरेमै थन्किए

रसुवा–नेपालको उत्तरी छिमेक चीनसँगको व्यापारिक नाका रसुवागढीबाट नेपाल भित्र्याइएका चिनियाँ विद्युतीय सवारीसाधन टिमुरेमै रोकिएका छन्। टिमुरेबाट रोंगादोभानसम्मका विभिन्न स्थान र भोटेकोसी पुल नजिक याङ्याङ पाखा, सानुभार्खु भीर एवं ठूलोभार्खु डाँडाको सडक हिलाम्य भएपछि विद्युतीय कारलगायत साना सवारीसाधन रोकिएका हुन्।

रसुवा भन्सार कार्यालय टिमुरेका प्रमुख भन्सार अधिकृत रामप्रसाद पाठकका अनुसार स्याफ्रु–रसुवागढी सडक खण्डमा अत्यधिक हिलो भएका कारण गत वर्ष र चालू आवको साउनमा आयात गरिएका चार सय बढी नयाँ कार, जीप, भ्यान टिमुरेमै रोकिएका छन्। यसबाट १ अर्बभन्दा बढी भन्सार शुल्क असुल गर्न बाँकी रहेको उनले बताए।

सडकको नाजुक अवस्थाका कारण रसुवागढी क्षेत्रमा अहिले एमबी, बिवाइडी, किङलङ र नेटा कम्पनीले आयात गरेका सवारीसाधन रोकिएको जनाइएको छ। सडक सुधार गरी नेपाल–चीनबीचको मालसामग्री आयात निर्यातमा सहजता गरिदिन सडकसँग सम्बन्धित निकायमा अनुरोध भइरहेको भन्सार कार्यालयले बताएको छ।

मालवस्तु आयात–निर्यात गर्ने प्रमुख नाकाको सडकमार्ग संरक्षणमा सडक विभाग गम्भीर हुनुपर्नेमा स्थानीय बासिन्दाले समेत माग राखेका छन्। सडक विभागले हिलो फ्याँक्न सक्ने एउटा ठूलो उपकरण र बलौटे माटो बोक्ने टिपरसमेत राख्नुपर्ने स्थानीयको माग छ।

चालू आर्थिक वर्षको साउनमा आयातीत चिनियाँ माल सामग्रीबाट १ अर्ब तीन करोड ९६ लाख ३७ हजार ९१ भन्सार शुल्कवापतको राजस्व संकलन भएको छ। साउनमा लक्ष्यभन्दा ३० दशमलव २६ प्रतिशतले राजस्व वृद्धि भएको हो।

चीनबाट जुत्ता, चप्पल, रेडिमेड कपडा, विद्युतीय उपकरण, रोल कपडा, बच्चाका खेलौनालगायतका विविध सामग्री आयात भएको बताइएको छ। साउनमा तीन सय ५० वटा कन्टेनरमार्फत चिनियाँ सामग्री नेपाल भित्रिएको भन्सार कार्यालयले जनाएको छ।

माल सामग्री परीक्षण कार्यमा कडाइ गरिएको र आफूले मगाएको सामानमा ब्राण्ड फरक पारी गलत घोषणा गर्ने कम्पनी वा फर्मका प्रतिनिधिलाई थप मूल्यको ५० प्रतिशत जरिमानासमेत गर्न थालिइएको छ। यसबाट चालू आवको पहिलो महिनामै त्यस्ता गलत विवरण भर्ने व्यापारीका प्रतिनिधिबाट आठ करोडभन्दा बढी जरिमाना गरिसकिएको प्रमुख भन्सार अधिकृत पाठकले जानकारी दिए।–रासस