गण्डकी पदाधिकारीमा ‘क्लिनस्विप’ गरेपछि पीएस भन्छन्- समाजवादी मोर्चा एमालेविरुद्ध छ, कामै छैन

पोखरा- नेकपा एमालेका उपमहासचिव पृथ्वीसुब्बा गुरुङले समाजवादी मोर्चाको औचित्य नरहेको बताएका छन्।

एमाले गण्डकी प्रदेश कमिटीका निर्वाचितलाई बधाई तथा शुभकामना दिन आयोजित कार्यक्रममा उपमहासचिव गुरुङले यस्तो बताएका हुन्। उनले समाजवादी मोर्चा एमालेविरुद्ध बनाइएको समेत जिकिर गरे।

नवनिर्वाचित नेतृत्वले एमाले विरोधी मोर्चाको औचित्य छैन भनेर तलसम्म सन्देश लैजानुपर्ने उनको भनाई छ।

‘समाजवादी मोर्चाको नाममा वामपन्थीहरु मिलेर बनाएको भनिएको मोर्चा सम्पूर्ण रुपमा एमालेविरुद्ध परिचालित छ,’ उनको जिकिर छ, ‘हामीले एमाले भन्दा अर्को लोकतान्त्रिक र बामपन्थी पार्टी छैन र त्यो भन्दा बाहिर रहेर हुँदैन भन्ने प्रमाणित गर्नुपर्नेछ।’

एमाले गण्डकी प्रदेश समितिको पदाधिकारीमा गुरुङ पक्षीय समूहले क्लिनस्विप गरेपछि गुरुङको प्रतिक्रिया प्रखर भएको हो। उनले अब पार्टीमा प्रतिस्पर्धाको प्रक्रिया सकिएर उन्नतस्तरको एकता प्रक्रिया शुरु भएकोसमेत दाबी समेत गरे। चुनाव भएपछि पाटी फुटिहाल्छ र सर्वसम्मत गरेपछि पार्टी निरंकुश हुन्छ भन्ने दुवै कुरा गलत रहेको उनको भनाइ छ।

परिस्थिति अनुसार चुनावी प्रक्रिया र सर्वसम्मतिको महत्त्व रहने उनले धारणा गुरुङको छ।

‘हाम्रो पार्टीभित्र दुई खाले गलत धारणा छन्। चुनावले पार्टी फुट्छ भन्ने एउटा गलत धारणा र मनोनयनले वा सर्वसम्मतिले नेतृत्व निरंकुश हुन्छ भन्ने दुवै सोच गलत हुन्,’ उनी थप्छन्, ‘एमाले उन्नत लोकतान्त्रिक अभ्यास गर्ने पार्टी हो, अब चुनावबाट नयाँ नेतृत्व चयनसँगै हामी एकजुट भइसकेका छौँ। हमेशा चुनाव र हमेशा सर्वसम्मत दुवै ठिक होइनन्।’

एमाले सधै लोकप्रिय हुनुको कारण यसमा रहेको आन्तरिक लोकतन्त्र नै प्रधान रहेको उनको जिरह छ। एमालेसँग लोकतान्त्रिक प्रक्रियाका विषयमा अरु पार्टीको तुलना हुनै नसक्ने उनको भनाइ छ।

मिसन २०८४ लाई मध्यनजर गरेर पार्टीको आन्तरिक जीवनलाई मजबुद्ध बनाउने चुनौती एमालेमा रहेको धारणा राख्दै उनले एमाले कमजोर रहँदा स्वाधिीनताको आन्दोलन र समृद्धिको अभियान अलपत्र पर्ने बताए।

कार्यक्रममा पार्टी सचिव तथा गण्डकी इञ्चार्ज गोकर्ण विष्ट, स्थायी कमिटी सदस्य खगराज अधिकारी, स्थायी कमिटी सदस्य थममाया थापा लगायतले बोलेका थिए।

शुक्रबार सबेरै सार्वजनिक नतिजामा नेकपा (एमाले) गण्डकी कमिटी अध्यक्षमा पिएस समूहका नवराज शर्मा विजयी भएका छन्।

उनले ५ सय ३१ मत प्राप्त गरे भने प्रतिस्पर्धी मायानाथ अधिकारीले ३ सय ६५ ल्याए। अधिकारी स्थायी कमिटी सदस्य खगराज अधिकारी पक्षका हुन्। खगराज पार्टी अध्यक्ष केपी ओली सन्निकट मानिन्छन्।

उपाध्यक्षमा मीनबहादुर गुरूङले ५ सय ३४ मत प्राप्त गरी निर्वाचित भए। उनका प्रतिस्पर्धी बाबुराम बिश्वकर्माले ३ सय ६२ मत प्राप्त गरे।

सचिवमा धनञ्जय दवाडी ५ सय २० मत ल्याएर दोहोरिँदा उनका प्रतिस्पर्धी रश्मी आचार्यले ३ सय ७६ मत ल्याए ।

उपसचिवमा दामबहादुर बिश्वकर्माले ४९९ मत ल्याएर विजयी भए । उनका प्रतिस्पर्धी सन्तोष रावलले ३ सय ९७ मत प्राप्त गरे।

महिला उपसचिवमा मञ्जु अधिकारीले ५ सय ३१ मत ल्याएर निर्वाचित हुँदा उनका प्रतिस्पर्धी मीना गुरूङले ३ सय ६५ मत प्राप्त गरिन्।

पदाधिकारीमा उपमहाचिव गुरूङको सेट नै निर्वाचित भयो।

कुल ९ सय ७ मतदातामध्ये ८ सय ९६ जनाले मतदान गरेको मुख्य निर्वाचन अधिकृत थापा मगरले बताए। ३३ वटा भोटिङ मेसिन प्रयोग गरेर मतदान भएको थियो।

१ सय ६५ पदका लागि भएको निर्वाचनमा २ सय ७७ जनाको उम्मेदवारी कायम भएको थियो। ३१ जना यसअघि नै निर्विरोध निर्वाचित भइसकेका थिए।

एमाले गण्डकीमा उपमहाचिव पृथ्वीसुब्बा गुरूङ र स्थायी कमिटी सदस्य खगराज अधिकारीको छुट्टाछुट्टै प्यानल थियो।

पार्टी अध्यक्ष केपी शर्मा ओलीले प्यानल बनाए उम्मेदवारी रद्द गर्नेसम्मको चेतावनी दिएका थिए। त्यसका बाबजुद उनी पक्षीय नेताहरूले नै प्यानल नै बनाएर उम्मेदवार मैदानमा उतारेका थिए।

एमाले गण्डकीमा एमालेका पदाधिकारी तहका नेता नै विभाजित देखिएका थिए। महासचिव शंकर पोखरेलको साथ स्थायी कमिटी सदस्य खगराज अधिकारीले बनाएको केन्द्रीय सदस्य मायानाथ अधिकारीको समूहलाई थियो।

उपमहासचिव गुरूङको पक्षमा वरिष्ठ उपाध्यक्ष ईश्वर पोखरेल, उपाध्यक्ष विष्णु पौडेलसहितका नेताहरू थिए।

महासचिव पोखरेल खगराजको पक्षमा उभिँदा प्रदेश अध्यक्षलगायत पदाधिकारीमा कडा प्रतिस्पर्धा हुने अनुमान गरिएको थियो।