कर्णालीमा ‘लालटिन’ अभियानको तयारी, के गर्छ यसले?

सुर्खेत- कर्णाली प्रदेश प्रहरी कार्यालय सुर्खेतले सुरक्षित कर्णाली विशेष अभियान, २०८०’ का साथमा ‘लागुऔषधविरुद्ध लालटिन’ सचेतना कार्यक्रम सञ्चालन गर्ने भएको छ।

प्रदेश प्रहरी सुर्खेतले सोमबार वीरेन्द्रनगरमा अन्तर्क्रिया तथा छलफल कार्यक्रम गरी सरोकारवालाबाट उक्त अभियान सञ्चालनका लागि सुझाव सङ्कलन गरिएको छ।

पछिल्लो समयमा लागुऔषधको कारोबारी तथा प्रयोगकर्ताको सङ्ख्या बढ्दै जान थालेपछि अभियान सुरु गर्न लागिएको हो।

लालटिन शब्द भने प्रतीकात्मक रूपमा प्रयोग गरिएको हो। लागुऔषध प्रयोकर्तालाई चेतनाको उज्यालो छर्ने विम्बका रूपमा ‘लालटिन’ शब्दलाई प्रदेश प्रहरी कार्यालयका प्रवक्ता एवं प्रहरी वरिष्ठ उपरीक्षक गोपालचन्द्र भट्टराईले बताए।

लागुऔषध प्रयोगकर्ता बढी भएका कर्णालीका जिल्लामा यसलाई बढी केन्द्रित गरिने प्रहरीको भनाइ छ। जिल्ला, पालिका र वडा तथा विद्यालय स्तरमा लालटिन समूह गठन गरी सचेतनामूलक कार्यक्रम गरिने भट्टराईले जानकारी दिए। यी सबै तहमा कम्तीमा एक जना प्रहरीको प्रतिनिधि सहभागी  हुनेछन्।

यो कार्यक्रमलाई निरन्तर रूपमा चलाउने प्रहरीको तयारी छ। प्रारम्भिक चरणमामा सुरुवाती केही समय यसका अलि बढी गतिविधि हुनेछन्।

पछिल्लो समय कर्णालीमा लागुऔषध प्रयोगकर्ता बढ्दै गएको छ। अन्य प्रदेशको तुलनामा कर्णालीमा लागुऔषध प्रयोगकर्ता भएपनि पछिल्ला वर्ष यो संख्या ह्वात्तै बढ्न थालेको प्रहरीको भनाइ छ।

कर्णालीका सुर्खेत र जुम्लामा लागुऔषध प्रयोगकर्ता बढी भएको प्रहरीको तथ्यांक छ। कर्णालीमा सिन्थेटिक (कृत्रिम) र प्राकृतिक लागुऔषध प्रयोग भइरहेका छन्।  भारतीय नाकाबाट नेपाल प्रवेश गर्ने सिन्थेटिक लागुऔषध कर्णाली पनि पुग्ने गरेका छन्।

लालटिन अभियानले सिन्थेटिक लागुऔषधलाई केन्द्रमा राखेर न्यूनीकरणको लक्ष्य राखेको छ। यद्यपि यो अभियान प्राकृतिक लागुऔषध नियन्त्रणमा पनि केन्द्रित हुनेछ।

अभियान तयारीका लागि सुझाव सङ्कलन गरिएको प्रदेश प्रहरी कार्यालयका प्रवक्ता एवं प्रहरी वरिष्ठ उपरीक्षक गोपालचन्द्र भट्टराईले जानकारी दिए। सोमबार ५५ वटा सरोकारवाला संघसंस्थाका प्रतिनिधिसँग लालटिन अभियानका विषयमा छलफल भएको थियो।

उनका अनुसार सुरक्षित कर्णाली विशेष अभियानको प्रारम्भका बेला प्रहरीले १ लाख ८४ हजार नागरिकको घरमा स्टिकर टाँसेको थियो। अब भने ‘लागुऔषधविरुद्ध लालटिन अभियान’ सुरु गर्न लागेको हो।

यो अभियानको यही असोज २५ गते उपप्रधान तथा रक्षामन्त्री पूर्णबहादुर खड्काले औपचारिकरूपमा उद्घाटन गरी अगाडि बढाउने कार्यक्रम तय भएको प्रदेश प्रहरी कार्यालय सुर्खेतले जनाएको छ।