जाजरकोट भूकम्पमा जनधनको ठूलो क्षति, यस्तो छ प्रारम्भिक विवरण

काठमाडौँ- जाजरकोटलाई केन्द्रबिन्दु बनाएर गएको भूकम्पका कारण जनधनको ठूलो क्षति भएको अनुमान नेपाल प्रहरीले गरेको छ। शुक्रबार राति ११:४७ मा ६.४ म्याग्निच्युडको भूकम्प जाँदा जाजरकोट, सुर्खेत, रुकुम पश्चिम, जुम्ला र कालिकोट बढी क्षति भएको छ।

क्षतिको विवरण प्राप्त हुने क्रम जारी रहेको प्रहरीले जानकारी दिएको छ। भूकम्पको केन्द्रबिन्दु मानिएको जाजरकोटको नलगाढ नगरपालिकाको एकै वडामा २० जनाको मृत्यु भएको छ।

नलगाढ नगरपालिका-१ का वडाध्यक्ष धनबहादुर महरका अनुसार वडाको सिउरी भन्ने स्थानमा १२ जना, कल्पतमा ५ जना र पाली भन्ने स्थानमा ३ जनाको मृत्यु भएको हो। ‘घरहरू ध्वस्त छन्, सुख्खा पहिरोको कारण बाटो अवरुद्ध छ। उद्धारमा कठिनाइ छ। घाइतेलाई अस्पताल पुर्‍याउन समस्या छ,’ उनले भने।

जिल्लाको भेरी नगरपालिकामा ९ जनाको मृत्यु भएको छ। भेरी नगरपालिकाका मेयर चन्द्रप्रकाश घर्तीका अनुसार भेरी नगरपालिकामा विभिन्न वडाहरुमा घर भत्किँदा ९ जनाको मृत्यु भएको विवरण आएको हो।

भूकम्पमा परी नलगाढ नगरपालिकाकी उपप्रमुख सरिता सिंहको मृत्यु भएको छ। सदरमुकाम खलंगामा सिंह बसेको घर भत्किँदा उनको निधन भएको जिल्ला प्रहरी कार्यालयका डीएसपी सन्तोष रोकाले जानकारी दिए।

‘उद्धार गरेर अस्पताल पठाउँदै गर्दा बाटोमा नै उहाँको मृत्यु भएको हो,’ रोकाले भने। सिंह गत स्थानीय निर्वाचनमा नेपाली कांग्रेसबाट उपप्रमुख पदमा निर्वाचित भएकी थिइन्।

रुकुम पश्चिममा मृत्यु हुनेको संख्या २२ पुगेको प्रारम्भिक विवरण प्राप्त भएको छ।

जिल्लाको आठबिसकोट नगरपालिकाकी उपप्रमुख धनकुमारी शाहीका अनुसार नगरपालिकाको वडा नं ११ मा ६ जना, वडा नं १३ मा ३ जना, वडा नं १४ मा ९ जना र वडा नं १२ मा ४ जना गरी २२ जनाको मृत्यु भएको हो।

भूकम्पमा परी सयौँ घाइते भएका छन् भने करोडौँको धनमाल नष्ट भएको अनुमान छ। क्षतिको विवरण प्राप्त हुने क्रम जारी रहेको प्रहरीले जानकारी दिएको छ।

प्रधानमन्त्री पुष्पकमल दाहालले तीनवटै सुरक्षा निकायलाई उद्धार‍मा जुट्न निर्देशन दिएका छन्।

घाइतेहरूको उद्धारका लागि शनिबार बिहानै औषधि, स्वास्थ्यकर्मी र हेलिकप्टर पठाउने तयारी भइरहेको हेलो सरकारले फेसबुक पोस्ट गरेको छ।

‘जाजरकोटको रामीडाँडा केन्द्रबिन्दु भएर शुक्रबार राति ११ः४७ मा गएको भूकम्पबाट भएको मानवीय तथा भौतिक क्षतिप्रति सम्माननीय प्रधानमन्त्री पुष्पकमल दाहाल ‘प्रचण्ड’ले गहिरो दुख व्यक्त गर्दै घाइतेहरुको तत्काल उद्धार र राहतका लागि ३ वटै सुरक्षा निकायलाई परिचालित गर्नुभएको छ,’ प्रधानमन्त्रीको समाजिक सञ्जाल ‘एक्स’को पोस्टमा उल्लेख छ।