मनाङ लिगको शीर्षस्थानमा, रोकिए जावलाखेल र खुमलटार

काठमाडौं – सहिद स्मारक ए डिभिजन लिगको शुक्रबार सम्पन्न खेलमा फ्रेन्ड्स क्लबलाई २–० ले हराउँदै मनाङ मस्र्याङ्दी क्लब लिग तालिकाको शीर्षस्थानमा पुगेको छ। अपराजित रहे पनि यसअघि शीर्षस्थान पुग्न नसकेको मनाङ सहज जितसँगै लिगलिडर बनेको हो।

शीर्षस्थानमा पुर्याउन मनाङका कोफी टिमोथीले दुवै गोल गरे। पहिलो हाफका ३४ औं मिनेटमा अग्रता दिलाएका टिमोथीले ५२ औं मिनेटमा अग्रतालाई २–० मा पुर्याएका थिए। त्यसपछि थप अवसर सिर्जना भए पनि उसले गोल गर्न भने सकेन।

यो जितसँगै १४ अंक बनाएको मनाङले शीर्षस्थानमा जावलाखेलसँग बराबरी गरेको छ। पराजित फ्रेन्ड्स क्लब भने तालिकाको १२ औं स्थानमा छ।

यसअघि शीर्षस्थानमा रहेको जावलाखेलले भने खुमलटार फुटबल क्लबसँग २–२ को बराबरी गरेको छ। सातदोबाटोमा सम्पन्न निकै रोमाञ्चक खेलको ३२ औं मिनेटमा एनकोटो मोसाबीले गोल गर्दै जावलाखेललाई अग्रता दिलाएका थिए।
त्यस्तै, ३५ औं मिनेटमा खुमलटारका अभिषेक लिम्बुले खेललाई १–१ को बराबरीमा पुर्याए।

जावलाखेल फुटबल टिम

दोस्रो हाफको ६३ औं मिनेटमा मेसुके ओलुमेउले खुमलटारलाई अग्रता दिलाए पनि निर्धारित समय सकिनुभन्दा चार मिनेट अघि फोडे फोफानाले गोल गर्दै खेललाई पुनः बराबरीमा ल्याए।

यो बराबरीपछि जावलाखेलले शीर्षस्थानको मनाङसँग अंक बराबरी गरे पनि गोलअन्तरका आधारमा दोस्रो स्थानमा छ। यता खुमलटार भने सात अंकका साथ नवौं स्थानमा छ।

ए डिभिजन लिगमा भोलि हिमालयन शेर्पा क्लबल र न्यु रोड टिमले एन्फा कम्प्लेक्समा खेल्नेछन्। त्यस्तै, अर्को खेलमा संकटाले मछिन्द्रको सामना गर्नेछ। यि दुवै खेल दिउँसो २ बजे सुरु हुनेछ। शनिबार साँझ दशरथ रंगशालामा हुने तेस्रो खेलमा भने सातदोबाटो युवा क्लबले आर्मीसँग खेल्ने तालिका छ।