बेगनासतालको मोटरबोट बन्द गर्न पोखरा महानगरको निर्देशन

पोखरा- पोखरा ३१ बेगनासतालमा सञ्चालनमा आएको मोटरबोटलाई बन्द गर्न पोखरा महानगरपालिकाले निर्देशन दिएको छ। ६ महिनाअघि ५० लाखको लागतमा मोटरबोट बन्द गर्न महानगरले बेगनासताल डुंगा व्यवसायी समिति निर्देशन जारी गरेको हो।

महानगरका प्रशासन महाशाखा प्रमुख कृष्णप्रसाद तिवारीले हस्ताक्षर गरेको पत्रमा मोटरबोट सञ्चालन गर्दा अन्य डुंगा व्यवसायमा असर पुर्‍याएको, माछालगायतका जलचरको प्रजनन तथा विकासमा प्रत्यक्ष असर गरेको उल्लेख छ।

मोटरबोट सञ्चालन गर्दा अनुमति नलिएको भनी बेगनासताल मत्स्य व्यवसायी समिति र स्थानीयको पटकपटक गुनासो आएकाले बन्द गर्न निर्देशन दिइएको पत्रमा उल्लेख छ। यस्तै, डुङ्गा व्यवसाय गरी जीविकोपार्जन गरिरहेका जलारी जातीको पेसामा प्रभाव पारेको गुनासो पनि उल्लेख छ।

महानगरले मोटरबोट बन्द भए, नभएको अनुगमन गरी जानकारी गराउन वडा कार्यालय पोखरा ३१ लाई निर्देशनसमेत दिएको छ। बेगनासताल डुंगा व्यवसायी समितिका पूर्वअध्यक्षसमेत रहेका ढकनाथ कँडेल अहिले पोखरा ३१ का वडाध्यक्ष छन्।