मासिक दुई लाख तलव र ग्रिनकार्डको प्रलोभनमा रुसी सेनामा पुग्थे नेपाली

काठमाडौँ- नेपाली युवालाई रुसी सेनामा भर्ती गराउने पठाएको आरोपमा पक्राउ परेका १२ जनालाई प्रहरीले सार्वजनिक गरेको छ। जिल्ला प्रहरी परिसर, काठमाडौँले नेपाली युवालाई भारत र यूएई हुँदै रुससम्म पुर्‍याएको आरोपमा उनीहरू पक्राउ परेका हुन्।

पक्राउ पर्नेमा काठमाडौँ, जोरपार्टीका सन्तोष रोका, सिन्धुपाल्चोक जिल्ला इन्द्रावती गाउँपालिकाका मनिष न्यौपाने छन्। यस्तै काठमाडौं-१६ का रोजल महर्जन र बुढानीलकण्ठका क्षितिज गिरी पनि सोही आरोपमा पक्राउ परेका छन्।

यस्तै सिराहाका दिपेन परियार, काभ्रेका सुवास लामा र चितवनका गोकर्ण अर्याल पनि नेपालीलाई रुसी सेनामा पठाउन संलग्न भएको आरोपमा पक्राउ परेका हुन्। यस्तै यही प्रकरणमा विगतमा कन्सल्टेन्सी चलाएकी सुजाता दाहाल र ईश्वर अधिकारी पनि पक्राउ परेका छन्। बाराका सन्तोष नेपाल र दाङका द्रोण डाँगी पनि पक्राउ परेका छन्।

यो प्रकरणमा पक्राउ परेका उदयपुरको कटारी नगरपालिका–६ का हरिबहादुर विश्वकर्मा मुख्य आरोपी हुन्। उनी म्यानपावर सञ्चालकसमेत भएको प्रहरीले जानकारी दिएको छ।

सुजाता दाहालको साथबाट २७ वटा र ईश्वर अधिकारीको साथबाट १६ वटा गरी ४३ वटा राहदानीसमेत प्रहरीले बरामद गरेको छ। सुजाताले रुस पठाउन भिसा प्रोसेसिङका लागि मात्र आफूले सहयोग गर्ने गरेको बयान दिएकी छन् भने ईश्वरले पनि इन्कारी बयान दिएका छन्।

पक्राउ परेकामध्ये उदयपुरको कटारी नगरपालिका–६ का पूर्वसैनिक समेत रहेका हरिबहादुर विश्वकर्मा प्रकरणका मुख्य आरोपी हुन्। उनी म्यानपावर सञ्चालकसमेत हुन्। काठमाडौं प्रहरीका डीएसपी अंगुर जिसीका अनुसार विश्वकर्माले दुई पटकमा १८ जनालाई रुस पठाएको बयानमा स्वीकारेका छन्।

रुसमा राम्रो तलब सुविधा भएको र ग्रिन कार्ड पनि चाँडै पाइने प्रलोभन देखाएर यो गिरोहले नेपालीलाई रुस पठाउँदै आएको थियो। ७ लाख जति खर्च हुने तर मासिक २ लाख रुपैयाँ कमाई हुने भनेर प्रचार गर्दै रुस पठाउने गरेको खुलेको काठमाडौँ प्रहरीले जानकारी दिएको छ।

नेपालीलाई प्रलोभन पारेर रुस पठाउने आश्वासन दिएको भए जिल्ला प्रहरी परिसर काठमाडौंमा सम्पर्क गर्न प्रहरीले अनुरोध गरेको छ।

यो गिरोहको साथबाट प्रहरीले २७ लाख ६० हजार बरामद गरेको छ। सुजता दाहाल र गोकर्ण अर्यालको कार्यालयबाट प्रहरीले १४ लाख १८ हजार ५ सय नगद बरामद गरेको छ।

सिनामंगलस्थित ईश्वर अधिकारीको कार्यालयबाट १३ लाख ४२ हजार नगद र १६ थान पासपोर्ट प्रहरीले बरामद गरेको छ।

रुसी सेनामा गएर मृत्यु भएका ६ नेपालीको विवरण परराष्ट्र मन्त्रालयले सार्वजनिक गरेको छ। उनीहरुको शवसमेत नेपाल ल्याउन विषयमा ठोस प्रगति नभएको परराष्ट्रको भनाइ छ।

केही नेपाली रुसी सेनामा गएर युक्रेनी सेनाको नियन्त्रणमा रहेका सामाजिक सञ्जालमा सार्वजनिक भएको छ। परराष्ट्र मन्त्रालयले भने एक जना मात्र युक्रेनी सेनाको नियन्त्रणमा रहेको र उनको रिहाइका लागि पहल भइरहेको बताएको छ।

नेपाल सरकारले सेनामा भर्ती हुन सन्धि भएका भारत र बेलायती सेनाबाहेकका कुनै पनि देशका सेनामा भर्तीमा नजान आह्वान गरेको थियो। तर त्यसलाई बेवास्ता गर्दै नेपालीहरू रुसी र युक्रेनी सेनामा भर्ती भएको पाइएको मन्त्रालयको भनाइ छ। तर कति जना नेपालीहरू ती देशका सेनामा भर्ती भएका छन् भन्ने विवरण सरकारसँग छैन।