रोयल इन्फिल्डका तीन भेरियन्ट सार्वजनिक, कति पर्ला मूल्य?

काठमाडौँ- नेपाली बजारमा रोयल इन्फिल्ड‍ले नयाँ तीन भेरियन्टका मोटरसाइकल सार्वजनिक गरिएको छ। नेपालका लागि रोयल इन्फिल्डको आधिकारिक बिक्रेता अल्फा अटोमोटिभले नक्सालस्थित रोयल इन्फिल्ड शोरुममा ३५० सीसी क्षमताका तीन मोडलका मोटरसाइकल सार्वजनिक गरिएको हो।

सार्वजनिक नयाँ मोडलमा मिटर फायरबल, स्टेललर र सुपरनोभा छन्। मोटरसाइकल त्रिवेणी ग्रुपका निर्देशक सुवासचन्द्र संघई र रोयल इन्फिल्डका प्रतिनिधि नेपाल बजार प्रमुख अभिषेक शुक्लाले संयुक्त रूपमा सार्वजनिक गरे।

यी मोटरसाइकलमा ३४९ सीसी सिंगल सिलिन्डर, फ्युल इन्जेक्टेड फोर स्ट्रोक, एयर–ओयल कुल्ड र इलेक्ट्रोनिक फ्युल इन्जेक्सन रहेको छ। उक्त इन्जिनले अधिकतम ६१०० आरपीएममा २०.२ ब्रेकहर्स पावर र ४००० आरपीएममा २७ एनएमको टर्क जेनेरेट गर्छ। यी मोटरसाइकलमा डुअल डिस्कब्रेक दिइएको छ।

यी सबै मोटरसाइकलहरुमा १५ लिटरको फ्युल ट्यांक क्षमता रहेको छ। प्रतिलिटर औषतमा ४० किमी माइलेज दिने यी मोटरसाइकलमा १४०० एमएम ह्विलबेस, ७६५ एमएम सिटको उचाई, ट्विन डाउनटुव स्पाइन फ्रेम छन्।

फायरबल मोडल पहेंलो, रातो, निलो र म्याट हरियो रंगमा उपलब्ध छ। स्टेलर कालो, निलो र रातो रंगमा उपलब्ध छ भने सुपरनोभा खैरो, निलो र रातो रंगमा उपलब्ध भएको कम्पनीले जानकारी दिएको छ।

फाइरबलको मूल्य ५ लाख ५० हजार, स्टेलरको मूल्य ५ लाख ५५ हजार र सुपरनोभाको मूल्य ५ लाख ६५ तोकिएको छ। सबै भेरियन्टको बुकिङ समेत खुलिसकेको कम्पनीले जनाएको छ।