बालेनलाई गृहमन्त्रीको जवाफ: बल प्रयोग गर्न अनुरोध मात्रै गरेर हुँदैन, औचित्य पुष्टि हुनुपर्छ

काठमाडौँ- उपप्रधान तथा गृहमन्त्री नारायणकाजी श्रेष्ठले काठमाडौँ महानगरपालिकाका मेयर बालेन्द्र शाहले लगाएको संघीय सरकारलाई लगाएको आरोपको खण्डन गरेका छन्। मेयर शाहले संघीय सरकारले आफ्ना काममा सहयोग नगरेको आरोप लगाउँदै सोमबार बिहान लामो स्टाटस लेखेपछि उपप्रधानमन्त्रीले त्यसको खण्डन गरेका हुन्।

चितवनमा पत्रकारसँग कुरा गर्दै उपप्रधानमन्त्री श्रेष्ठले स्थानीय तहसँग समन्वय गरी काम गर्न तयार भएपनि सहयोग गर्नका लागि औचित्य पुष्टि हुनुपर्ने बताएका हुन्। मेयर शाहका कतिपय विषयले औचित्य पुष्टि गर्न नसकेकाले सहयोग नगरिएको गृहमन्त्रीसमेत रहेका श्रेष्ठको भनाइ छ। यद्यपि उनले प्रदेश र स्थानीय तहसँग समन्वय गरेर अघि प्रतिबद्धता भने व्यक्त गरेका छन्।

सिंहदरबारले समस्याको चाङ देखोस् भनेर फोहोर नउठाइएको हो

‘काठमाडौँ महानगरका मेयरका बारेमा म अहिले व्यक्तिगत रूपमा कुनै टिप्पणी गर्न चाहन्नँ। प्रदेश र स्थानीय सरकारसँग समन्वय गरेर संघीय सरकार संविधानले दिएको जिम्मेवारीलाई पूरा गर्न प्रतिबद्ध छ,’ उपप्रधानमन्त्री श्रेष्ठले भनेका छन्, ‘स्थानीय सरकार वा प्रदेश सरकारले म यसो गर्छु भन्ने अनि बल प्रयोग गर्न अनुरोध मात्रै गर्ने जानकारी दिएर मात्र त हुँदैन। यसबारे मैले महानगरका मेयरलाई प्रस्ट भनेको छु।’

आफूले गर्न लागेका कामको औचित्य पुष्टि गर्न आफूले मेयर बालेन्द्रलाई आग्रह गरेको उनको भनाइ छ। स्थानीय सरकारका अधिकार क्षेत्रमा हस्तक्षेप नगर्ने तर संघीय सरकार वा प्रदेश सरकारको सहयोग चाहिए तथ्यसम्मत भएको पुष्टि गर्नुपर्ने उनको धारणा छ। ‘हामीले सहयोग गर्ने कुरामा चाहिँ औचित्य पुष्टि गर्ने गरी उहाँले तथ्य दिनुपर्छ,’ पत्रकारसँग गृहमन्त्री श्रेष्ठले भने, ‘त्यसबारेमा समय लिएर सुविचारित रूपले स्टेप चाल्नुपर्छ भन्ने मात्रै हाम्रो कुरा हो।’

बालेनले प्रधानमन्त्री प्रचण्ड र गृहमन्त्री श्रेष्ठसँग आफूले भेटवार्ता गरिरहेको तस्बिर पोस्ट गर्दै मेयर बालेनले सिंहदरबारले कुनै सहयोग नगरेको आरोप लगाएका थिए।

फेरि किन ‘फायर’ भए बालेन?