भन्सारका कर्मचारीलाई अर्थमन्त्रीको निर्देशन- नतिजा दिने गरी काम गर्नू

काठमाडौँ- अर्थमन्त्री डा प्रकाशशरण महतले कर्तव्यनिष्ठ भएर काम गर्न र नतिजा देखाउन भन्सार विभागका कर्मचारीलाई निर्देशन दिएका छन्। भन्सार विभागद्वारा आयोजित भन्सार व्यवस्थापन गोष्ठीलाई सम्बोधन गर्दै उनले आफ्नो जिम्मेवारीलाई उच्च प्राथमिकता दिन निर्देशन दिएका हुन्।

‘आयात निर्यातमा संलग्न व्यवसायीलाई अनावश्यक दुःख दिने भनेको होइन, जायज कुराहरु के हुन् तपाईंहरुलाई नै थाहा छ, तर कार्यान्वयन भइरहेको छैन, म यहाँहरुलाई त्यतातर्फ ध्यानाकर्षण गराउन चाहन्छु,’ उनले भने। आफ्नो नेतृत्वमा अर्थ मन्त्रालय पारदर्शी ढङ्गबाट काम गर्न लागिपरेको उल्लेख गर्दै उनले जिम्मेवार पदाधिकारीलाई गम्भीर भएर काम गर्न निर्देशन गरे।

‘जवाफदेही र जिम्मेवार बनाउने परम्पराको हामी सुरुआत गरौँ,’ उनले भने। धेरै कारणबाट राजस्व घटेको र राजस्व घट्नुमा भन्सारको सम्पूर्ण दोष नरहेको भन्दै उनले राजस्व चुहावट रोक्न सुरक्षा निकायसँग पनि गम्भीर छलफल गरिएको बताए। सुरक्षा निकाय र भन्सार कर्मचारीको समन्वयमा निगरानी गर्न उनको आग्रह छ।

‘धेरै भन्सार नाकाबाट राजस्व सङ्कलन घटेको छ। ती नाकाबाट पनि राजस्व चुहावट भएको खबर छ। भैरहवा, वीरगञ्ज, रसुवा नाकामा पनि त्यस्तै अवस्था छ। यसलाई गम्भीर ढङ्गबाट लिनुहोला,’ मन्त्री महतले भने।

साधारण खर्च धान्न नसक्ने गरी आय घट्नु दुर्भाग्यपूर्ण भएको उल्लेख गर्दै उनले अहिलेको अवस्थालाई राजनीतिक नेतृत्वले उच्च महत्व दिएको बताए। ‘राजनीतिक नेतृत्व यसमा गम्भीर छ। यो गम्भीरतालाई मध्यनजर राखेर जहाँजहाँ समस्या छन् ती समस्यालाई समाधान गर्न हाम्रोतर्फबाट कुनै कसर बाँकी राखिने छैन,’ डा महतको भनाइ थियो।

उद्योगी व्यवयायीलाई अनावश्यक झन्झट, पीरमर्का परिरहेकाप्रति आफूहरु संवेदनशील रहेको भन्दै मन्त्री डा महतले यस विषयमा भन्सारका अधिकारीहरुले पनि ध्यान दिनुपर्ने बताए।