उपनिर्वाचनको तयारी बारे उपप्रधानमन्त्रीद्वयसँग आयोगको छलफल

काठमाडौँ- रिक्त रहेका प्रतिनिधिसभा, प्रदेशसभा र स्थानीय तहका विभिन्न पदहरुको उपनिर्वाचनको तयारी बारे निर्वाचन आयोगले २ जना उपप्रधानमन्त्रीसँग छलफल गरेको छ।

आयोगका प्रमुख निर्वाचन आयुक्तले उपप्रधानमन्त्री एवं रक्षामन्त्री पूर्णबहादुर खड्का र उपप्रधामन्त्री एवं गृहमन्त्री नारायणकाजी श्रेष्ठसँग सिंहदरबारस्थित कार्यालयमा छलफल गरेका हुन्।

स्थानीय तह, प्रदेश सभा सदस्य, प्रतिनिधि सभा सदस्य र जिल्ला समन्वय समितिका गरी २५ पद रिक्त छन्। ती पदमा उपनिर्वाचनमार्फत पदपूर्ति गर्नुपर्ने कानुनी व्यवस्था छ।

निर्वाचन आयोगका प्रवक्ता शालिग्राम शर्मा पौडेलका अनुसार दुवै जना उपप्रधानमन्त्रीसँगको छलफलमा प्रमुख आयुक्तले रिक्त पद र आयोगले उपनिर्वाचनका लागि गरिरहेको आन्तरिक तयारीबारे जानकारी दिएका थिए। उनले भने, ‘छलफलमा उपप्रधानमन्त्रीले उपनिर्वाचनको तयारी गरिराख्न र थप परामर्श गरेर निर्वाचनको मिति घोषणा गर्ने बताउनुभयो।’

आयोगले आगामी वैशाखमा उपनिर्वाचन गर्न उपयुक्त हुने बताउँदै आएको छ। आयोगका अनुसार हाल प्रतिनिधि सभा सदस्य र प्रदेश सभा सदस्यको १÷१ पद रिक्त छ। स्थानीय तहका १७ वडा अध्यक्ष र गाउँपालिकाको अध्यक्ष १, नगरपालिकाका उपप्रमुख १ र गाउँपालिकाका उपाध्यक्षको २ पद रिक्त छ। त्यसै गरी जिल्ला समन्वय समिति प्रमुखको २ पद रिक्त छ।