बालेनलाई सरकारको जवाफ- जे भइरहेको छ, राम्रो भइरहेको छैन

काठमाडौँ- संघीय सरकारकी प्रवक्ता समेत रहेकी सञ्चार तथा सूचना प्रविधि मन्त्री रेखा शर्माले काठमाडौँ महानगरपालिकाका मेयर बालेन्द्र शाहले गरेका कामले सकारात्मक सन्देश नदिएको भन्दै असन्तुष्टि व्यक्त गरेकी छन्।

मन्त्रिपरिषद्का निर्णय सुनाउन आयोजित पत्रकार सम्मेलनमा मन्त्री शर्माले महानगरका सुकुम्बासी बस्ती व्यवस्थापनका विषयमा सरकार गम्भीर भएको बताउँदै महानगरका मेयर बालेन्द्र शाहका गतिविधिमाथि गम्भीर भएको बताएकी हुन्।

‘जे भइरहेको छ। राम्रो भइरहेको छैन। संविधान र कानुन मान्दिनँ भनेर बाहिर जाने कुरा गर्न कसैले पनि खोज्नु हुन्न,’ उनले भनिन्, ‘यसमा हामी सबै संवेदनशील बन्नुपर्छ।’

महानगरका मेयर बालेन्द्र शाहले उठाएका विषयमा प्रधानमन्त्रीसहित मन्त्रिपरिषद्ले गम्भीर रूपमा लिएको बताएकी उनले कानुनी र नीतिगत रूपमा काम गरिने बताइन्। महानगरका मेयर साहले ‘संविधान, नीति र कानुन नै मान्दिनँ’ भन्ने तहसम्मको अभिव्यक्ति दिनु दुखद् भएको बताएकी उनले थपिन्, ‘स्थानीय सरकार पनि सरकार हो। उसले पनि संविधान, नीति र कानुन पनि बुझ्नुपर्छ। मान्नुपर्छ। त्यसैअनुसार चल्नुपर्छ।’

कानुनका व्यवस्था आफूलाई मन नपरे परिवर्तन गर्न पाइने तर सार्वजनिक पदमा बसेको व्यक्तिले कानुन मन नपरे मान्दिनँ भन्न नपाइने उनको भनाइ छ। ‘हाम्रा नीतिगत व्यवस्था बेठिक पनि हुन सक्छन्। हामीलाई चित्त नबुझेको पनि हुन सक्छ। त्यस्ता व्यवस्था तर या त परिवर्तन गर्नुपर्छ। नत्र कानुन संविधान मान्दैनौँ भन्यो भने हुन्छ के? यसले कस्तो सन्देश दिन्छ? भन्ने कुरा हामीलाई थाहा छ। यसले सकारात्मक सन्देश प्रवाह गर्दैन।’

संविधानमा नै फोहोरमैला व्यवस्थापनको जिम्मा स्थानीय सरकारको भनेर प्रष्ट रूपमा लेखिएको तर मेयर बालेन्द्र साहले कार्यअधिकार क्षेत्र बाहिरका विषयमा आफ्नो इच्छा पूर्ति गर्न फोहोर नउठाएर गलत सौदाबाजी गरेको उनको संकेत थियो।

‘अर्को कुनै विषय पूर्तिका लागि त्यसलाई हडतालको विषय बनाइनु हुन्न। यो धेरै संवेदनशील विषय हो। जिम्मेवार व्यक्ति र निकायले यस्तो विषयमा यस्ता खाले कदम चाल्नु जनस्वास्थ्यमाथि खेलबाड ठहर्छ,’ उनले भनिन्, ‘उहाँले भनेका विषय टुंगिएन भने जनस्वास्थ्यमाथि खेलबाड गर्न पाइँदैन। काठमाडौँको मेयर जस्तो मान्छेले कानुन र संविधान बुझ्नुभएन भन्ने म ठान्दिनँ। सुकुक्मबासीको व्यवस्थापन गर्ने कुरामा संघीय सरकारले सहयोग गरेन भन्ने पनि होइन। संघले लगेर एकैपटक डोजर लगाउने कुरा होइन। सकरारका विभिन्न निकाय छन्। यो कानुनी र संवैधानिक ढंगबाट सबैसँग समन्वय गरी काम गर्ने विषय हो।’

उता आजै मात्र काठमाडौँ महानगरपालिकाका मेयर बालेन्द्र शाहले काठमाडौंको हितमा काम नगरे राजधानी सार्न संघीय सरकारलाई चेतावनी दिएका थिए।  ‘कि काठमाडौंको हितमा काम गर्नुहोस्, कि सिंहदरबार अरु पालिकामा सार्नुहोस्। हामी काठमाडौं बासीलाई कुनै आपत्ति छैन,चाहे सिंहदरबार सार्नुस् कि राजधानी सार्नुस्। हामीलाई हाम्रो सम्पदा, संस्कृति, कला, सभ्यता चाहिन्छ, राजनीति हैन,’ मेयर बालेनले लेखेको स्टाटसमा भनिएको छ।

फेरि किन ‘फायर’ भए बालेन?

यसअघि मेयर बालेन्द्र शाहले काठमाडौँका विभिन्न स्थानमा अतिक्रमित भूमी खाली गर्न संघीय सरकारले सहयोग नगरेको आरोप लगाएका थिए। तर संघीय सरकारका उपप्रधानमन्त्री तथा गृहमन्त्री नारायणकाजी श्रेष्ठ प्रकाशले तथ्यबाट पुष्टि हुन नसक्ने काममा संघ सरकारले सहयोग नगर्ने बताएका थिए। संघ सरकारले महानगरपालिकाका मेयर बालेन्द्र शाहलाई जिम्मेवारीबोध गर्नसमेत सचेत गराएको छ।

यसअघिकै मन्त्रिपरिषद् बैठकले सिंहदरवारको फोहोर नउठाएको विषयमा संघीय सरकारले काठमाडौँ महानगरका मेयर बालेन्द्र शाहसँग छलफल गर्ने समेत निर्णय गरेको थियो।

संघीय सरकारले आफ्ना काममा सहयोग नगरेको भन्दै सिंहदरबार, बालुवाटार र शीतलनिवासको फोहोर नउठाउन महानगरको सम्बन्धित विभागलाई निर्देशन दिएका छन्। उनको निर्देशनपछि ती स्थानमा फोहोर थुप्रिन थालेको छ।