ग्रीन अटोमोबाइल्सले देशभर डीएफएसके डाँफे बिक्री–वितरण गर्ने

काठमाडौं– दिगो ग्रुपले आफ्नो आधिकारिक सामाजिक सञ्जालमार्फत डीएफएसके डाँफे–इसी३६को देशव्यापी बिक्री र वितरणका लागि ग्रीन अटोमोबाइल्ससँग सम्झौता गरेको छ।

ग्रीन अटोमोबाइल्ससँगको सहकार्यले आधुनिक यातायात आवश्यकताका लागि पर्यावरणमैत्री र नवीन समाधान उपलब्ध गराउने दिगोको प्रतिबद्धताको महत्त्वपूर्ण क्षण रहेको दुवै संस्थाले जनाएका छन्।

दिगोअन्तर्गत एनइभी नेपाल प्रालिले चार वर्षदेखि ११ सिटे डीएफएसके डाँफे इलेक्ट्रिक मिनीभ्यान बिक्री र वितरण गर्दै आएको छ। यो गाडी नेपालमा सार्वजनिक यातायातका लागि प्रयोग हुने पहिलो ११ सिटर इलेक्ट्रिक मिनीभ्यान हो। यसमा विद्युतीय इन्जिन भएकाले उत्कृष्ट आर्थिक फाइदा दिने र विगत केही वर्षदेखि यात्रा, विद्यालय र व्यावसायिक उद्देश्यका लागि प्रयोग भइरहेको छ।

दिगोपन र शून्य कार्बन उत्सर्जन, लामो दायरा र कम सञ्चालन लागतमा योगदानको कारण गाडी सबैको रोजाइमा परेको कम्पनीको दाबी छ। यो गाडी हालसम्म २,९०,००० प्लस किलोमिटर र दौडिएको छ।

मिसन शून्य उत्सर्जनको आफ्नो उद्देश्यसाथ दिगोले नेपालमा विद्युतीय सवारीसाधनको इकोसिस्टम प्रवर्द्धनमा केन्द्रित रहेको छ। उनीहरूले नेपाली बजारमा विद्युतीय सवारीसाधन बिक्री, सर्भिस र स्पेयर पार्ट्सका साथै दिगोमार्फतका अन्य भागले विद्युतीय सवारीसाधन भाडामा दिने र चार्जिङ समाधान उपलब्ध गराउँछन्।

सम्झौतापछि ग्रीन अटोमोबाइल्स अटोमोटिभ वितरण क्षेत्रमा डीएफएसके डाँफे बिक्रीका लागि बलियो नेटवर्क हुने बताइयो। ग्रीन अटोमोबाइल्सको व्यापक उपलब्धता, प्रभावकारी वितरण र बिक्रीपछिका सेवा सुनिश्चित गर्न महत्त्वपूर्ण भूमिका खेल्ने अपेक्षा गरिएको छ।

ग्रीन अटोमोबाइल्सको प्रतिनिधित्व गर्ने अर्जुन कार्की तथा साझेदारद्वय प्रवीण खतिवडा र निरोज महर्जनले अटोमोटिभ बिक्रीमा यो सम्झौता सफल हुने विश्वास व्यक्त गरे।

दिगो ग्रुप अफ कम्पनीज्का अध्यक्ष राजन रायमाझीले डीएफएसके डाँफेलाई नेपालभरका ग्राहकमाझ लैजान ग्रीन अटोमोबाइल्ससँग सहकार्य गरिएको बताए।