१३ सांसदका प्रश्नको उत्तर दिँदै प्रधानमन्त्री, ओली अनिच्छुक

काठमाडौँ- प्रतिनिधिसभाको आजको बैठकमा प्रधानमन्त्री पुष्पकमल दाहाल प्रचण्डले सांसदका प्रश्न सामना गर्ने भएका छन्। बिहान ११ बजे सुरु हुने बैठकमा सांसदहरूले सोधेका प्रश्नहरूको जवाफ प्रधानमन्त्रीले दिने कार्यसूची रहेको संसद सचिवालयले जानकारी दिएको छ।

प्रधानमन्त्रीले १३ जना सांसदले सोधेका प्रश्नको उत्तर दिने भएका छन्। संसद सचिवालयमा आएका प्रश्न सचिवालयले प्रधानमन्त्री तथा मन्त्रिपरिषद्को कार्यालयमा पठाएको छ। प्रतिनिधिसभामा प्रत्येक महिनाको पहिलो साता प्रधानमन्त्रीसँग प्रश्नोत्तर कार्यक्रम गर्ने व्यवस्था छ।

नेकपा एमालेका अध्यक्ष केपी शर्मा ओलीले भने प्रतिनिधि सभामा प्रधानमन्त्री पुष्पकमल दाहाल प्रचण्डमाथि प्रश्न नउठाउने भएका छन्। सार्वजनिक र पार्टीका आन्तरिक बैठकमा सरकारको खरो आलोचना गर्ने छवि बनाएका ओली सदनमा भने सरकारको कामकारबाहीका विषयमा मौन बस्ने भएका हुन्।

सांसदले प्रधानमन्त्रीलाई सोध्ने प्रश्न अग्रिम रुपमा संसद सचिवालयमा टिपाउनुपर्ने व्यवस्था छ। संसद सचिवालयका अनुसार आइतबार क्रम संख्या ३४ देखि ४८ सम्मका सांसदसँग प्रश्न माग गरिएको थियो। यो क्रम संख्यामा नेकपा एमालेका अध्यक्ष केपी शर्मा ओलीको नाम पनि समावेश छ। प्रश्न टिपाउन सांसदहरुलाई बुधबारसम्म समय तोकिएको थियो। तर यो समयमा ओलीले नाम टिपाएनन्।

एकै पटक सबै सांसदसँग प्रश्न माग गर्दा व्यवस्थापकीय अप्ठ्यारो हुने भएकाले संसद सचिवालयले संसदहरुको क्रमसंख्याको आधारमा एक पटकमा बढीमा १५ जना सांसदको प्रश्न लिने गरेको छ।

एमालेका सचेतक महेश बर्तौलाले पार्टीका अध्यक्षले प्रश्न नटिपाएपनि अन्य सांसदले प्रश्न गर्ने बताए।

आइतबारकै बैठकमा सभामुख देवराज घिमिरेले प्रधानमन्त्री तथा मन्त्रिपरिषद्को कार्यालयबाट प्राप्त कार्यभार तोकिएकोसम्बधी पत्र पढेर सुनाउने कार्यक्रम छ।

बैठकमा अर्थमन्त्री प्रकाशशरण महतले आर्थिक कार्यविधि तथा वित्तीय उत्तरदायित्वसम्बन्धी अध्यादेश स्वीकृतिका लागि प्रस्ताव गर्ने कार्यसूची छ।