एमाले र रास्वपासहित नवगठबन्धनको बैठक साढे २ बजे, राप्रपा प्रतिगमनकारी

काठमाडौँ-  नेकपा एमाले र रास्वपासहितको बनेको नयाँ गठबन्धनको बैठक सोमबारै फेरि बस्ने भएको छ।

प्रधानमन्त्री निवास बालुवाटारमा दिउँसो साढे २ बजे फेरि बैठक बस्ने निर्णय नेताहरूले गरेका हुन्।

प्रधानमन्त्री पुष्पकमल दाहाल प्रचण्डले कांग्रेससहितको गठबन्धन तोडेर नयाँ गठबन्धन बनाएका हुन्।

नयाँ गठबन्धन बनाएका प्रधानमन्त्री दाहालले सोमबारै पुराना मन्त्रीहरूलाई बिदा गरेर नयाँ मन्त्रीलाई शपथ दिलाउने तयारी गरेका छन्।

बालुवाटारबाट उठेका एमाले, माओवादी, रास्वपा र जसपासहित सबै दलका नेताहरू आन्तरिक छलफलमा जुटेका छन्। तर एमालेका अध्यक्ष केपी शर्मा ओली भने जिफन्टको कार्यक्रममा प्रज्ञा भवनमा सहभागी भएका छन्।

यसैगरी नयाँ गठबन्धनमा राप्रपालाई भने सहभागी नगराउने निर्णय प्रचण्ड र ओलीले गरेका छन्।

राप्रपा प्रतिगमनकारी शक्ति भएकाले उसलाई गठबन्धन र सरकारमा स्थान नदिने निर्क्योल ‍ओली-प्रचण्डले गरेका हुन्।

नयाँ गठबन्धनमा भएका सहमतिलाई लिखित रूप दिने तयारी पनि भइरहेको एमाले स्रोतको दाबी छ।