संसदमा कांग्रेसले भन्यो- प्रचण्डले जनमतको घोर अपमान गरे

काठमाडौँ– नेपाली कांग्रेस संसदीय दलका प्रमुख सचेतक रमेश लेखकले प्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहाल प्रचण्डले जनमतको अपमान गरेको आरोप लगाएका छन्।

कांग्रेससँग गठबन्धन तोडेर एमालेसँग सत्ता समीकरण बनाएपछि सँगै चुनाव लडेको कांग्रेसले सदनमा कांग्रेसमाथि विश्वासघात गरेको आरोप लगाएका हुन्।

बिहीबार प्रतिनिधिसभा बैठकमा समय लिएर बोल्दै उनले प्रचण्डले एकतर्फी रुपले अविश्वसनीय रुपमा गठबन्धन तोडेको टिप्पणीसमेत गरे।

‘निर्वाचनमा प्रतिबद्धता गरेर अहिले गठबन्धन भत्काउनु जनमतको पनि घोर अपमान हो’, उनले भने, ‘आफ्नो जिम्मेवारीबाट भाग्ने गठबन्धन भत्काउने जुन अविश्वसनीय काम गरियो। यसलाई कठोरतापूर्वक भन्नैपर्‍यो यो राजनीतिक बेइमानी हो।’

प्रचण्डमा राजनीतिक इमान नदेखिएको बताए। ‘यो व्यक्तिगत सम्बन्धमा आधारित भएर गरिएको निर्णय होइन, आज पनि मेरा आदरणीय नेता प्रचण्डप्रति उत्तिकै सम्मान छ। तर राजनीतिक रुपमा इमान भएन, इमान नभएको हुनाले बेइमान भनिएको हो’, उनले भने।

कांग्रेससँगको गठबन्धन भत्काउने प्रधानमन्त्रीको निर्णयले मुलुकलाई शृंखलावद्ध अस्थिरतातिर जाने खतरा देखिएको नेता लेखकको भनाइ थियो।

प्रचण्डले आफ्नो कमजोरी एक-दुई जना मन्त्रीको टाउकोमा हाल्ने काम गरेको उनले बताए।