उपेन्द्र यादवले लिए शपथ, उपप्रधानमन्त्रीको संख्या ४ पुग्यो

काठमाडौँ- जनता समाजवादी पार्टी (जसपा)का अध्यक्ष उपेन्द्र यादव पनि उपप्रधानमन्त्री बनेका छन्।

राष्ट्रपति रामचन्द्र पौडेलले यादव र जसपाकै नवलकिशोर साहलाई मन्त्रीमा नियुक्त गरी शपथ दिलाएका हुन्।

प्रधानमन्त्री पुष्पकमल दाहालको सिफारिसमा यादवलाई स्वास्थ्य तथा जनसंख्यामन्त्रीको जिम्मेवारी दिइएको छ।

योसँगै प्रचण्ड नेतृत्वको वर्तमान सरकारमा उपप्रधानमन्त्रीको संख्या ४ पुगेको छ।

यसअघि नै मन्त्रिपरिषद्मा उपप्रधानमन्त्री तथा परराष्ट्रमन्त्रीको जिम्मेवारीमा माओवादीका नारायणकाजी श्रेष्ठ, उपप्रधानमन्त्री तथा भौतिक पूर्वाधार तथा यातायातमन्त्रीमा एमालेका रघुवीर महासेठ र उपप्रधानमन्त्री तथा गृहमन्त्रीको जिम्मेवारीमा रास्वपाका रवि लामिछाने छन्।

साहले वन तथा वातावरण मन्त्रालयको जिम्मेवारी पाएका छन्।

योसँगै मन्त्रीको संख्या २२ पुगेको छ।

संविधानअनुसार प्रचण्डलाई अझै ३ जना मन्त्री थप गर्न पाउने सुविधा छ।

गठबन्धनमा आबद्ध हुने दलको संख्या थप हुन आएमा बाँकी मन्त्री पनि पूर्ति गर्ने तयारीमा प्रचण्ड छन्।